Nënkryetari i Bashkimit Demokratik për Integrim, Izet Mexhiti dhe sekretari organizativ Blerim Bexheti nuk kanë marrë pjesë sot në takimin e fundvitit të organizuar nga BDI-ja, në një hotel të kryeqytetit.
Përveç tyre në këtë event nuk ka marrë pjesë as Musa Xhaferi, që është pjesë e të ashtuquajturit “Grupi i Zjarrit” dhe disa funksionarë të tjerë, pjesëtarët e të cilit kanë shprehur hapur pakënaqësinë nga puna e ministrave të BDI-së dhe kanë kërkuar ndërrimin e tyre. Por, kjo kërkesë deri tani nuk është marrë parasysh nga kryetari i partisë Ali Ahmeti. Ndërkohë, në takimin e sotëm ku fjalim mbajti vetëm kryetari Ahmeti, ka marrë pjesë edhe kryetari i Kuvendit Talat Xhaferi, ministrat, deputetët dhe funksionarë tjerë të lartë të kësaj partie. Ahmeti gjatë fjalës së tij tha se, BDI-ja ka qenë e pamposhtur në 20 vitet e kaluara dhe ka porositur se të gjitha grupimet kundër saj vetëm e kanë forcuar këtë parti.