Në shënimin e 23-vjetorit të themelimit të Bashkimit Demokratik për Integrim, festa në Çair duket se nuk arriti të ngjallë emocionin dhe masivitetin që dikur e karakterizonte këtë subjekt politik, shkruan POPULLI.mk.
Sipas burimeve dhe pamjeve të shpërndara në rrjete sociale, në aktivitetin e mbajtur në parkun e Çairit ishin të pranishëm rreth 300 persona — një numër që për një bastion të shpallur si “kështjellë” e BDI-së, duket tejet modest.
Kjo ngre pyetjen e natyrshme: A dështoi BDI në organizimin dhe mobilizimin në Çair?
Në një komunë ku kjo parti ka qeverisur për vite me radhë dhe ka ndërtuar bazën e saj politike, një pjesëmarrje kaq e ulët ngjan si sinjal alarmi. Qytetarët nuk janë më aq të entuziazmuar, dhe festa e 23-vjetorit, që dikur do të kishte gjallëruar gjithë zonën me mijëra simpatizantë, këtë herë kaloi me jehonë të zbehtë.
Pritshmëritë ishin më të larta. Jo vetëm për faktin se bëhej fjalë për një përvjetor të rëndësishëm, por edhe sepse Çairi është simbolikisht një pikë kyçe për fuqinë e BDI-së në Shkup. Niveli i ulët i pjesëmarrjes është një reflektim i qartë i lodhjes politike, i humbjes së kontaktit me bazën dhe i rënies së besimit të qytetarëve.
A e ka humbur BDI besimin e çairasve?
Kjo ngjarje, për shumëkënd, është një tregues i qartë se po. Qytetarët e Çairit kanë nisur të kërkojnë alternativa të reja, të zhgënjyer nga premtimet e pambajtura, arroganca e strukturave lokale dhe mungesa e rezultateve të prekshme.
Festa e 23-vjetorit ishte më shumë një pasqyrë e realitetit të ri politik, sesa një shfaqje force.
Nëse BDI nuk e sheh këtë si një thirrje për reflektim të thellë, atëherë rënia në Çair mund të mos jetë e përkohshme, por pjesë e një prirjeje më të gjerë drejt ndryshimit politik në këtë komunë. / © POPULLI.mk
