Në Alicante të Spanjës është prezantuar zyrtarisht projekti “EU4IP – Ballkani Perëndimor”, një iniciativë e përbashkët e Zyra e Pronësisë Intelektuale e Bashkimit Evropian dhe Komisionit Evropian që synon të forcojë sistemet e pronësisë intelektuale në vendet e Ballkanit Perëndimor dhe në Republikën e Moldavisë. Projekti shihet si një hap i rëndësishëm në mbështetje të proceseve integruese drejt Bashkimit Evropian dhe afrimit të standardeve rajonale me ato evropiane.
Programi do të përqendrohet në modernizimin e institucioneve të pronësisë intelektuale, përmirësimin e procedurave dhe rritjen e mbështetjes për bizneset, inovatorët dhe ndërmarrjet e vogla dhe të mesme. Përmes kësaj iniciative, vendet pjesëmarrëse pritet të përfitojnë nga ekspertiza dhe mjetet digjitale të BE-së për të krijuar një ambient më të sigurt për mbrojtjen e markave, shpikjeve dhe krijimeve të ndryshme.
Drejtori Ekzekutiv i EUIPO-s, João Negrão, theksoi se forcimi i pronësisë intelektuale ndihmon në zhvillimin ekonomik dhe krijimin e një shoqërie më inovative. Projekti, i cili do të zgjasë tre vjet dhe do të financohet nga Bashkimi Evropian dhe EUIPO, do të zbatohet në bashkëpunim me institucionet kombëtare dhe organizatat rajonale për të lehtësuar integrimin ekonomik dhe tregtar me tregun evropian.