Një ditë e veçantë dhe e mbushur me emocione është shënuar për Ansamblin Ansambli “Ibe Palikuqi”, i cili është nderuar me dekoratë nga Presidentja e Republikës së Kosovës, Vjosa Osmani, për kontributin e tij të jashtëzakonshëm ndër vite në ruajtjen dhe promovimin e kulturës kombëtare, informon POPULLI.mk
Drejtori i ansamblit, Vebi Amza, ka shprehur krenarinë dhe mirënjohjen e tij për këtë vlerësim, duke theksuar se dekorata është rezultat i punës së palodhshme të shumë brezave që kanë kontribuar në zhvillimin e ansamblit – që nga periudha e ish-Jugosllavisë e deri në ditët e sotme.
Ai nënvizoi se ky çmim nuk i përket vetëm drejtuesve apo anëtarëve aktualë, por çdo artisti dhe kontribuuesi që me përkushtim, dashuri dhe sakrificë ka ndihmuar në kultivimin e trashëgimisë kulturore shqiptare.
Sipas Amzës, ky vlerësim është dëshmi e gjallë se arti, tradita dhe identiteti kombëtar vazhdojnë të jetojnë dhe të shkëlqejnë, ndërsa për ansamblin përbën një shtysë të re për të vazhduar misionin me përulësi dhe përgjegjësi.
Ai gjithashtu u shpreh personalisht i privilegjuar dhe i emocionuar për mundësinë që të përfaqësojë një vlerë kaq të madhe kulturore, duke e cilësuar këtë moment si të paharrueshëm.
Në fund, drejtori falënderoi të gjithë ata që kanë qenë dhe vazhdojnë të jenë pjesë e rrugëtimit të ansamblit, duke theksuar se synimi mbetet ngritja edhe më e lartë e emrit të Ansamblit “Ibe Palikuqi” dhe promovimi i kulturës shqiptare. / © POPULLI.mk