Gazetari Avdi Bakiu ka reaguar ashpër ndaj qëndrimeve politike lidhur me luftën në Gaza, duke kritikuar hapur kryeministrin e Shqipërisë, Edi Rama, dhe kandidatin e AKI për komunën Çair, Bujar Osmani, informon POPULLI.mk.
Në një shkrim të tij, Bakiu u shpreh se “nuk ka më shpirt human që e mban hidhërimin brenda vetes nga gjithë ky tmerr që Izraeli ka shkaktuar dhe po shkakton në Gaza”.
Sipas tij, pamjet që transmetohen çdo ditë nga Gaza tregojnë fëmijë të vrarë, të uritur dhe të zhdukur nën bombardime, gjë që e bën të pamundur heshtjen.
“Gjithçka që banorët e Gazës kërkojnë nga bota është që ta ngrisim zërin kundër gjenocidit që po na transmetohet drejtpërdrejt 24/7. Askush nuk mund të gënjejë se nuk i ka parë këto pamje, askush nuk mund të prodhojë justifikime hipokrite”, ka theksuar ai.
Duke iu referuar Ramës dhe Osmanit, Bakiu tha se ata që zgjedhin të qëndrojnë në anën e gabuar të historisë, përkrah gjenocidit, “do të përfundojnë në koshin e plehrave”.
Gazetari theksoi se qëndrimet politike të dyshes shqiptare, të cilat sipas tij injorojnë vuajtjen e palestinezëve, janë të pafalshme dhe do të mbeten një njollë historike. / © POPULLI.mk