Bashkësia fetare islame kumtoi se është kundër miratimit të ligjeve për barazi gjinore dhe për evidencën amë dhe se qëndrimi i saj lidhur me ligjet kontestuese për të cilat hapet debat në opinion, është, “para së gjithash mbrojtje e vlerave tradicionale familjare, edhe për nga struktura, edhe për nga morali”.
BFI, siç ceket, edhe më herët doli me qëndrim se e mbështetë vendimin e të gjithë krerëve të bashkësive fetare në vend, i cili doli si rezultat i tkaimit të përbashkët të 7 majit të këtij viti, me ç’rast u cek se ligjet për të cilat bëhet fjalë janë në kundërshtim me parimet religjioze dhe se nuk do të mbështeten.
“Mbrojtja e gjenit familjar dhe njerëzor është parim bazë nga i cili nuk mund të distancohemi, sepse ai është thelbi i shoqërisë së shëndoshë. Shikuar historikisht, në të kaluarën, për momentin dhe në të ardhmen, BFI çdoherë do të mbetet në mbrojtje të vlerave nacionale, fetare, morale dhe shpirtërore, sepse ,brojtja e këtyre vlerave është obligim fetar për mbrojtje të shoqërisë njerëzore. Çdo nismë, cila do qoftë ide apo parim juridik që është në kundërshtim me natyrën njerëzore është i papranueshëm për BFI-në. Sipas informatave me të cilat disponojmë, ligjet kontestuese në Kuvend janë tërhequr nga procedurat e mëtutjeshme dhe për këtë e urojmë Qeverinë për ndërmarrjen e një hapi të tillë”, ceket në kumtesën e BFI-së.