Dy incidente të ndara, të ndodhura brenda të njëjtës ditë, kanë pasur në shënjestër zyrtarë policorë në Prizren dhe Suharekë.
Policia e Kosovës ka njoftuar në raportin e saj se rreth orës 19:00 në Prizren, një person është arrestuar pasi dyshohet se ka kanosur dhe penguar një zyrtar policor që ishte duke i shqiptuar një tiketë trafiku vëllait të tij.
I dyshuari ka reaguar në mënyrë agresive ndaj policit, duke e penguar në kryerjen e detyrës zyrtare. Pas arrestimit, me vendim të prokurorit, ai është liruar në procedurë të rregullt.
Po ashtu, në orën 19:00 në autoudhën e Suharekës, një zyrtar policor jashtë detyrës është sulmuar fizikisht. Polici kishte hasur dy mjete të ndaluara në shiritin rrugor dhe ishte ndalur për të paralajmëruar drejtuesit e automjeteve për rrezikun e krijuar, sidomos për shkak të mjegullës së dendur. Gjatë bisedës, njëri nga të dyshuarit e ka sulmuar fizikisht policin. Viktima ka marrë trajtim mjekësor në QKMF Suharekë, ndërsa policia është në kërkim të sulmuesit.