Zhvillimet e fundit brenda koalicionit VLEN po sinjalizojnë një fazë të re riorganizimi dhe konsolidimi politik. Kryetari i Lëvizjes Besa, Bilall Kasami, po synon një model të ri drejtimi në kuadër të VLEN-it, duke propozuar bashkëkryesimin me Izet Mexhitin. Kjo lëvizje shihet si përpjekje për të balancuar raportet e brendshme dhe për të krijuar një qendër më të fortë vendimmarrjeje, në një kohë kur koalicioni përballet me sfida politike dhe organizative, shkruan POPULLI.mk
Një tjetër çështje që po diskutohet është rishpërndarja e disa pozitave që aktualisht udhëhiqen nga AlternAtivA. Brenda VLEN-it ekziston ideja për një rikonfigurim të përgjegjësive, me qëllim forcimin e rolit të Besës dhe rritjen e ndikimit të saj në strukturat drejtuese dhe ekzekutive.
Fuqizimi i VLEN-it konsiderohet i domosdoshëm në këtë fazë, sidomos pas qëndrimit të Arben Fetait, i cili ka pranuar modelin e ri me Kasamin dhe Mexhitin si bashkëkryetarë. Ky zhvillim interpretohet si një hap drejt stabilizimit të brendshëm dhe ndërtimit të një fronti më të unifikuar politik.
Në të njëjtën kohë, brenda Lëvizjes Besa pritet një proces pastrimi dhe riorganizimi, ku disa individë mund të largohen nga strukturat partiake. Kjo shihet si pjesë e një reformimi të brendshëm për të konsoliduar linjën politike dhe për të shmangur përplasjet që kanë karakterizuar periudhën e fundit.
Ndërkohë, një vijë e kuqe mbetet çështja e Fatmir Limanit. Nëse ai vazhdon të mbetet ministër, nuk përjashtohet mundësia që Besa të rishqyrtojë pozicionin e saj në Qeveri, madje edhe të marrë vendim për largim. Një hap i tillë do të kishte pasoja të drejtpërdrejta në stabilitetin qeveritar dhe në raportet brenda koalicionit VLEN.
Në ditët në vijim pritet të qartësohen qëndrimet zyrtare, por është e qartë se VLEN po hyn në një fazë vendimtare që do të përcaktojë drejtimin e tij politik dhe organizativ. / © POPULLI.mk