VLEN u krijua si reagim ndaj një modeli të konsumuar politik, ndaj një qeverisjeje që për vite me radhë prodhoi pushtet për vete dhe zhgënjim për qytetarët. Sot, ky subjekt gjendet para një prove serioze. A do të shndërrohet në alternativë reale apo do të mbetet vetëm një bashkim elektoral pa bosht të qartë politik. Përgjigjja varet drejtpërdrejt nga udhëheqja. Pikërisht këtu hyn roli i Izet Mexhitit.
Shkruan Hamzi Ibrahimi
Së pari, VLEN ka nevojë për një kryetar me përvojë reale politike, jo formale. Izet Mexhiti nuk është produkt i laboratorëve partiakë dhe as figurë e imponuar nga lart. Ai është formuar në terren, në institucione dhe në përballje të drejtpërdrejta politike.
Kjo përvojë është thelbësore në një fazë kur VLEN duhet të ndërtojë struktura funksionale, të menaxhojë dallimet e brendshme dhe të përballet me kundërshtarë të sprovuar në pushtet.
Së dyti, Mexhiti e njeh mirë sistemin që VLEN synon ta ndryshojë. Ai i di mekanizmat e kapjes së shtetit, mënyrën se si bllokohet administrata dhe si shndërrohen institucionet në vegla partie. Pikërisht kjo njohje e brendshme e bën atë më të rrezikshëm për sistemin e vjetër dhe më të dobishëm për një projekt reformues. Ndryshimi nuk bëhet vetëm me slogane, por me njohje të detajuar të problemit.
Së treti, VLEN është një subjekt i përbërë nga struktura dhe individë të ndryshëm, me histori dhe qasje të ndryshme politike. Ky pluralizëm është forcë vetëm nëse menaxhohet drejt.
Izet Mexhiti ka treguar se di të ndërtojë konsensus, të dëgjojë dhe të mbajë balancë mes interesave të ndryshme pa e humbur drejtimin politik. Ai nuk ndërton unitet artificial, por unitet funksional.
Një tjetër element kyç është raporti me qytetarin. VLEN nuk mund të jetë thjesht pozitë ndaj një partie tjetër opozitare. Por Duhet të jetë zë i pakënaqësisë reale të njerëzve. Mexhiti ka një stil komunikimi të drejtpërdrejtë, pa retorikë boshe dhe pa premtime që nuk mbahen. Kjo e bën më të besueshëm në një klimë ku besimi politik është në nivel minimal.
Po ashtu, VLEN ka nevojë për një figurë që nuk shihet si e përkohshme. Kryetari duhet të japë ndjenjën e stabilitetit dhe seriozitetit. Izet Mexhiti nuk është eksperiment dhe as kompromis i rastësishëm.
Ai përfaqëson vazhdimësi politike, por jo vazhdimësi të gabimeve. Pikërisht ky kombinim e bën të pranueshëm edhe për elektoratin skeptik.
Në fund, pyetja nuk është kush është më i zëshëm apo më i pëlqyeshëm në rrjete sociale. Pyetja është kush mund ta mbajë VLEN-in të bashkuar, ta udhëheqë me maturi dhe ta shndërrojë në alternativë serioze pushteti. Në këtë kontekst, Izet Mexhiti nuk është zgjedhje emocionale, por zgjedhje politike e arsyetuar.
Nëse VLEN synon të zgjasë, të rritet dhe të fitojë besimin e qytetarëve, atëherë i duhet një kryetar që e di çfarë do dhe si arrihet ajo. Izet Mexhiti i përmbush këto kritere.