Albin Kurti, me fitoren e tij të parë të thellë në zgjedhjet parlamentare ku bashkë me Listën Guxo të Vjosa Osmanit, hapi një kapitull të ri për historinë politike të Kosovës. Qeveria e tij u shqua për vendosmërinë dhe vizionin e qartë për ndryshime thelbësore, të cilat për herë të parë në një periudhë katërvjeçare ia dolën ta çonin mandatin deri në fund. Për një politikë kosovare të stuhishme dhe shpeshherë të luhatshme, kjo arritje është dëshmi e stabilitetit dhe përkushtimit të Kurtit për ta parë Kosovën më të fuqishme dhe më të lirë, shkruan POPULLI.mk
Një prej arritjeve më të rëndësishme dhe më të diskutueshme në këto katër vite është pastrimi i Mitrovicës nga bandat serbe dhe largimi i tyre bashkë me krye-kriminelin Milan Radoiçiq. Ky veprim erdhi si një përpjekje e gjatë dhe e guximshme e Kurtit për të krijuar një ambient më të sigurt dhe më të drejtë për të gjithë qytetarët e Kosovës, pa dallime etnike.
Ndërhyrja kundër krimit të organizuar dhe ndikimeve të jashtme në veriun e vendit përforcoi sovranitetin e Kosovës dhe u pa si një fitore e ndjeshme ndaj ndërhyrjeve destabilizuese nga Serbia. Ky hap vërtetoi seriozitetin e qeverisë së Kurtit në trajtimin e çështjeve të sigurisë dhe rendit, çka përforcoi besimin e qytetarëve dhe e bëri të qartë te ndërkombëtarët se Kosova është e aftë të mbrojë integritetin e saj territorial, në bashkëpunim me aleatët.
Një tjetër sukses i qeverisë Kurti ishte heqja e vizave për qytetarët e Kosovës. Ky proces i gjatë dhe i ndërlikuar ishte ndoshta një prej kërkesave më të mëdha të popullit që nga shpallja së pavarësisë. Me liberalizimin e vizave, qeveria Kurti arriti një moment historik për të rinjtë, bizneset dhe qytetarët që kanë ëndërruar për një Kosovë të integruar me Evropën. Kjo arritje e mundësoi lëvizjen e lirë në zonën Schengen, duke dëshmuar që qeveria ka mundur të bindë Bashkimin Evropian për përparimet dhe reformat e realizuara.
Kurti, që në fillim të mandatit, e bëri të qartë se synon të forcojë Ushtrinë e Kosovës. Për herë të parë, ky buxhet shënoi një rritje domethënëse, duke siguruar më shumë burime për trajnimin dhe pajisjen e forcave ushtarake. Kjo rritje financiare vjen në një kohë kur tensionet rajonale dhe sfidat e sigurisë janë në rritje, dhe kur çdo shtet në rajon përpiqet të sigurojë mbrojtje efektive. Me këtë veprim, qeveria Kurti po vendos një themel të fortë për mbrojtjen e vendit dhe po garanton një siguri më të qëndrueshme për të ardhmen. Ky investim u shoqërua edhe me zhvillimin e partneriteteve më të ngushta me NATO-n dhe SHBA-në.
Me zgjedhjet e ardhshme më 9 shkurt, sondazhet parashikojnë që Albin Kurti dhe Lëvizja Vetëvendosje mund të sigurojnë mbi 50% të votave, një sukses që rrallë ndodh në rajon për një lider të zgjedhur më parë. Kjo mbështetje e gjerë vjen si reflektim i arritjeve të qeverisë Kurti, në forcimin e sovranitetit të vendit dhe përparimin drejt integrimit evropian.
Në përmbyllje, katërvjeçari i Albin Kurtit shënon një kohë të ndryshimeve të mëdha për Kosovën – ndryshime që po formojnë një shoqëri më të sigurt, më të lirë dhe më të integruar me Evropën. Ky mandat është dëshmi e një lidershipi të matur dhe të vendosur për të lënë një trashëgimi që, sipas qytetarëve, meriton të vazhdojë edhe më gjatë. / © POPULLI.mk