Një ditë para fillimit të vitit të ri shkollor, shumë prindër thonë se ende nuk i kanë marrë subvencionet për librat. Ata ankohen se shuma prej 80 eurosh nuk mjafton për t’i mbuluar të gjitha shpenzimet dhe se ekzekutimi i mjeteve është vonuar. E njohës të arsimit propozojnë mënyra të tjera për t’i pajisur nxënësit me libra
Jo të gjithë nxënësit e shkollave fillore do ta nisin vitin e ri shkollor të hënën, të pajisur me libra.
Ministria e Arsimit, Shkencës dhe Teknologjisë as këtë vit nuk ka arritur që t’i ekzekutojë mjetet për subvencionimin e librave para fillimit të procesit mësimor.
Përveç vonesave, prindërit janë ankuar edhe për pamjaftueshmërinë e mjeteve për t’i blerë librat.
Jetmira Haxhimushoviq, nënë e dy fëmijëve, njërin në klasën e pestë e tjetrin në të katërtën, ka thënë se edhe nëse ekzekutohen mjetet, ato nuk janë të mjaftueshme për t’i blerë të gjithë librat.
“Edhe vitin e kaluar kur i kanë ekzekutuar, shumë para është dashur t’i shtonim vetë për t’ua blerë librat fëmijëve. Nuk kanë dalë mjetet. Ndoshta është dashur me qenë ndryshe, ta bënin më herët të aplikonim, që ne me qenë të gatshëm për të filluar mësimi, pra t’i kenë librat nxënësit, jo të presim tani derisa t’i bëjnë ose t’i blejmë ne me para tona. Edhe nëse i ekzekutojnë mjetet, prapë ne jemi minus”, ka thënë ajo.
Lia Rudi, nëna e një vajze në klasë të tretë, thotë po ashtu se kostoja e blerjes së librave e ka kaluar shumën prej 80 eurosh të subvencionit.
“Për hir të së vërtetës mendoj që janë pak me vonesë (ekzekutimi i mjeteve). Nëse kthehemi në suazën që ka njerëz të cilët i kanë dy-tre fëmijë dhe vlera prej 80 eurosh jo çdoherë është e rikuperueshme, duke pasur parasysh edhe afatin që ne planifikojmë t’i dërgojmë fëmijët në shkollë të hënën. Është jo mirë e menaxhueshme dhe me vonesa. Kemi 2-3 ditë, planprogrami është shpërndarë se cilat libra, por në të njëjtën kohë subvencionimi nuk është bërë”, ka thënë Rudi.
E ish-zëvendësministri i Arsimit, Dukagjin Popovci, thotë se mënyra më efikase dhe më e sigurt për sigurimin e teksteve do të ishte shpërndarja direkte e librave në shkolla.
Kjo, sipas tij, do t’i shmangte keqpërdorimet.
“Për tekste besoj se mjafton dhe tepron diçka edhe për mjete mësimore…Në këtë situatë kur njerëzit duhet t’i blejnë librat, ata mësojnë se cilat libra duhet t’i blejnë tek më 1 shtator, kur shkojnë fëmijët në shkollë, sepse janë botuesit e ndryshëm dhe shkollat e ndryshme, nuk përcaktohen të gjitha për libra të njëjtë. Ditët e para të shtatorit, 1, 2 dhe 3 , kur duhet të blihen librat. Me siguri që nuk i kanë mjetet disa njerëz të cilët e kanë gjendjen ekonomike pak më të vështirë, duhet të presin”, ka thënë Popovci.
Në Ministrinë e Arsimit nuk kanë treguar se kur pritet të përfundojë procesi i ekzekutimit të mjeteve për tekstet shkollore që nisi vetëm javën e kaluar, e as nëse mësimi do të fillojë në të gjitha shkollat.
Ani se blerja e librave shkollorë përmes ekzekutimit të mjeteve po bëhet për të tretin vit radhazi, shkak për vonesa është edhe verifikimi që duhet të bëhet nga ana e drejtorive të Arsimit, pas keqpërdorimeve që janë bërë viteve të kaluara.
Zyra Kombëtare e Auditimit ka evidentuar se një pjesë e përfituesve nuk i kanë plotësuar kriteret për subvencionim.