A do të “flasë” ish-zëvendëskryeministri, i cili pas largimit nga funksioni u vendos në “listën e zezë” të SHBA-së dhe u bë i dyshuar në një rast për Lotarinë Shtetërore, për tre bashkëpartiakë nga BDI, një ish-sekretar të përgjithshëm të LSDM-së dhe vëllain e një ish-kryeministri?
Ish-zëvendëskryeministri Artan Grubi, i cili së fundmi u kthye në vend pas 14 muajsh arratisje, pas së cilës u vendos në arrest shtëpiak për një rast të lidhur me Lotarinë Shtetërore, për një kohë të gjatë kishte bërë përpjekje për të arritur një marrëveshje politike për rikthimin e tij në vend, shkruan revista javore “Fokus”.
Sipas burimeve tona, menjëherë pas ndryshimeve politike, fillimisht lideri i BDI-së, Ali Ahmeti, kishte bërë përpjekje përmes rrugëve politike që t’i siguronte Grubit një terren më të favorshëm për betejën juridike, por në atë kohë ishte refuzuar kategorikisht nga qeveria e udhëhequr nga VMRO-DPMNE. Por a ka ndryshuar diçka ndërkohë?
Siç thonë persona të afërt me Grubin, ai është larguar me zemër të rënduar dhe e kishte shumë të vështirë të qëndronte larg shtëpisë së tij. Prandaj, për një kohë të gjatë kishte tentuar përmes kanaleve të ndryshme politike, por edhe familjare, të arrinte një marrëveshje për rikthimin e tij, përpjekje që me kalimin e kohës u intensifikuan për disa arsye – dëshironte të kthehej te familja, ndihej i harruar nga Mala Reçica dhe ishte shënjestër kërcënimesh.
Nëse e gjithë kjo e ka shtyrë Grubin të kërkojë dhe të sigurojë rikthimin nën kushte më të favorshme (arrest shtëpiak), atëherë çfarë mund të japë ai në këmbim?
Siç thotë një përfaqësues i pushtetit, Grubi ka lënë të kuptohet se do të flasë dhe do të tregojë gjithçka që di për disa ish-bashkëpartiakë në parti dhe në qeveri.
I njëjti burim thotë se personi që ndodhet në “listën e zezë” të SHBA-së ka përpiluar edhe “listën e tij të zezë”, ku pesë persona janë në plan të parë:
• deputeti aktual Blerim Bexheti
• ish-ministri i Ekonomisë Kreshnik Bekteshi
• ish-ministri i Punëve të Jashtme Bujar Osmani
• ish-sekretari i përgjithshëm i LSDM-së, Mile Zeçeviq
• vëllai i ish-kryeministrit Zoran Zaev, Vice Zaev
Rastësi apo jo, pikërisht këto dhe disa emra të tjerë, të lidhur me ish-qeverinë LSDM–BDI, këto ditë u përmendën nga përfaqësues të VMRO-DPMNE-së, të cilët, ndër të tjera, pretendojnë se opozita frikësohet nga ajo që mund të zbulojë Grubi para prokurorisë, gjë që mund të përcaktojë se kush mund të ulet pranë tij në bankën e të akuzuarve./Fokus