Edhe për shtatë pacientë të tjerë me fibrozë cistike, nga gjithsej 55 sa janë në pritje, është siguruar ilaçi Trikafta. Terapia që ka kushtuar 100 milionë denarë, tashmë është në Klinikën Universitare për sëmundje të fëmijëve dhe është siguruar për muajt e ardhshëm. Ministri i Shëndetësisë, Fatmir Mexhiti, thotë se çdo 10 ditë do të kyçen nga 7 pacientë në terapi. Ai tha se për sigurimin e ilaçit për vitin 2024 dhe 2025 janë planifikuar 854 milionë denarë.
“Më kujtohet para disa muajsh kriza që u krijua për shkak të procedurave burokratike që krijuan panik te pacientët me fibrozë cistike, revolta e tyre ishte e justifikuar, e familjarëve, e njerëzve të dashur. Edhe revolta e publikut ishte e justifikuar dhe ne si Qeveri duhej të ndryshonim diçka. Si Ministër i Shëndetësisë dhe mbi të gjitha si mjek afatgjatë, pacientët e mi dhe shëndeti i tyre ishin gjithmonë në vend të parë”, tha Fatmir Mexhiti, ministër i Shëndetësisë.
Drejtoresha e Klinikës së Fëmijëve, Stojka Naceva-Fustiq beson se në vitin 2024 do të futen në terapi të gjithë pacientët që kanë të drejtë për terapi, pra pacientët 12 vjeç e sipër.
“Besoj se në vitet në vijim kufiri i moshës për fillimin e terapisë do të ulet, si është edhe në vendet tjera të Evropës, por e rëndësishme është që medikamenti ka hyrë tek ne dhe do të ofrohet terapi në vazhdimësi për 2024 dhe 2025”, pohoi Stojka Naceva-Fustiq – drejtoreshë e Spitalit Pediatrik.
Fiki Gaspar nga Asociacioni për fibrozë cistike falënderoi institucionet dhe tha se një numër i madh i prindërve dhe pacientëve do të jenë të qetë dhe nuk do të kenë frikë për jetën e tyre dhe të fëmijëve.
“Mund të them se për një periudhë relativisht të shkurtër, krahas të gjitha ngjarjeve dhe përpjekjeve si të pacientëve ashtu edhe të institucioneve, në vitin 2024 dhe 2025 do të ofrohet terapi modulare për të gjithë pacientët e moshës 12 vjeç e lart”, pohoi Fiki Gaspar – Asociacioni me fibrozë cistike .
Vlerësohet se kjo terapi do të përmirësojë cilësinë e jetës së këtyre pacientëve dhe do të reduktojë shtrimin në spital. Përndryshe, fibroza cistike është sëmundje e rrallë që e kanë rreth 130 persona në vend, dhe rreth 80 e kanë gjenotipin e nevojshëm për të marrë ilaçin “trikafta”.
Burimi TV21 MV