Koalicioni VLEN hedh poshtë interpelancën e Blerim Bexhetit, Musa Xhaferit, Sadulla Durakut, Artan Grubit dhe përfaqësuesve të BDI-së dhe Frontit Evropian “si qëndrim të papërgjegjshëm ndaj qytetarëve dhe të ardhmes së tyre”.
Më poshtë mund ta lexoni reagimin e koalicionit VLEN
Kjo është një lëvizje klasike e parashikueshme e BDI-së pas dështimit të grupeve të afërta të Artan Grubit për të dëmtuar festën e organizuar të 28 nëntorit. Ata krijuan probleme dhe tani po ia kalojnë fajin dikujt tjetër.
BDI ka organizuar problemet dhe incidentet. Ata krijojnë probleme, i ekspozojnë qytetarët në rrezik, i lënë në mëshirën e tyre, ikin prej tyre dhe në fund përpiqen të përdorin për pikë politike.
Blerim Qoseto Bexheti, ministri i qetë dhe i bindur i Gruevskit, i cili ishte ministër i Drejtësisë kur ndodhi rasti “Monstra” dhe BDI nuk bëri asgjë për ta zbardhur, por lanë popullin të vuajë. Ministri që jepte tenderë për punonjësit në zyrën e tij dhe së bashku me Sasho Mijalkovin ishte në krye të drejtësisë, i kapur me armë dhe lëndë narkotike në një diskotekë, partner biznesi i Danela Arsovskës, më së paku kanë të drejtë të paraqesin interpelancë kundër zëvendëskryeministri Izet Mexhiti dhe kundër zëvendësministrit Astrit Iseni.
Interpelanca duhet të bëhet në BDI ndaj njerëzve të afërt të Artan Grubit që organizuan incidentet dhe prishën festën e bukur të flamurit shqiptar.
Ju nuk mund ta quani veten Fronti Evropian, por përpiquni ta destabilizoni vendin dhe ta largoni atë nga perspektiva evropiane, vetëm sepse keni frikë nga pasojat e krimit tuaj. Kjo interpelancë është një manovër e pabazë politike. VLEN do të vazhdojë me reformat dhe ndërtimin e stabilitetit institucional, ndryshe nga ata që abuzojnë me mandatin e tyre për interesa personale. Qytetarët meritojnë politikë të përgjegjshme, jo kthim në kaosin e kaluar.
Meqë ra fjala, asgjë nuk do t’i shpëton këta njerëz nga pasojat e krimit të tyre dhe dëmi që u shkaktuan shqiptarëve në Maqedoninë e Veriut.