Një zhvillim i ri politik është paralajmëruar në skenën shqiptare, ku është bërë e ditur krijimi i një subjekti të ri politik me emrin “Lidhja Shqiptare”, i cili do të udhëhiqet nga Ziadin Sela, informon POPULLI.mk
Gjatë një interviste për LajmTV, përfaqësuesi i këtij grupacioni ka theksuar se bëhet fjalë për një organizim të ri, i ndërtuar mbi baza ideale dhe me synim krijimin e një strukture të fortë politike. Sipas tij, pjesë e këtij formacioni janë individë të përkushtuar, të cilët nuk e shohin dorëheqjen apo tërheqjen si zgjidhje.
Ai ka bërë të ditur se partia tashmë është krijuar dhe se nuk është lënë asgjë rastësisë, duke shtuar se emri “Lidhja Shqiptare” përfaqëson vazhdimësinë e një ideje dhe kauze politike të mëhershme.
Po ashtu, është theksuar se ky subjekt do të mbajë identitet kombëtar, duke u përfaqësuar me ngjyrat kuq e zi, ndërsa synimi kryesor mbetet organizimi dhe rikthimi në skenën politike me një qasje më të konsoliduar.
Në thelb të këtij organizimi të ri qëndron ideja e vazhdimësisë së një projekti politik, duke lënë të kuptohet se bëhet fjalë për një riformatim dhe jo thjesht për një nisje nga e para. / © POPULLI.mk