Presidenti amerikan, Joe Biden do të udhëtojë sot në Belfast, si pjesë e vizitës zyrtare në Irlandën e Veriut dhe Irlandë.
Biden pritet të mbërrijë sot në mbrëmje, në kryeqytetin e Irlandës së Veriut dhe të takohet me kryeministrin britanik, Rishi Sunak.
Presidenti i SHBA-së ka planifikuar gjithashtu të mbajë një fjalim në një takim me studentët.
Vizita e tij po zhvillohet me rastin e 25-vjetorit të Marrëveshjes së së Premtes së Mirë të vitit 1998, që i dha fund konfliktit midis mbështetësve protestantë të bashkimit të vazhdueshëm me Britaninë e Madhe dhe atyre katolikë të një Irlande të bashkuar.
Biden do të niset nesër në Dublin, ku do t’i drejtohet parlamentit përmes një fjalimi.
Presidenti amerikan, Biden i cili është me origjinë irlandeze, gjithashtu ka në plan të vizitojë qytetet e lindjes së të parëve të tij.