Maqedonia e Veriut po përballet me një valë të paprecedentë zhvillimesh politike, të cilat kanë krijuar një klimë intensive në skenën politike të vendit, shkruan POPULLI.mk
Një termet politik, që buron jo vetëm nga pakënaqësitë e popullatës ndaj keqpërdorimeve dhe skandaleve nga pushteti i kaluar, por edhe nga presionet për reforma themelore, po pritet të tronditë Maqedoninë e Veriut në periudhë të shkurtë kohore. Ky tërmet duket se është më shumë se një krizë e zakonshme politike – është një pikë kthese që mund të përcaktojë të ardhmen e vendit me një Qeveri të re dhe shumë stabile për katër vitet e ardhshme.
Gjatë viteve të fundit, janë raportuar raste të shumta të keqpërdorimeve financiare dhe abuzimeve me pushtetin nga disa figura kyçe të Qeverive të kaluara. Populli ka pritur një periudhë reflektimi dhe reformash të thella për t’i çliruar institucionet nga ndikimet korruptive. Qeveria e re ka paralajmërar se po hetohen shumë ish-funksionerë dhe keqpërdorimet janë të shumta.
Aferat korruptive janë bërë pothuajse një e përditshme në narrativën politike. Të korruptuarit, që shpeshherë kanë lidhje të ngushta me pushtetin, kanë ndërtuar një sistem që mbulon veprimtaritë e paligjshme dhe që mund të mbetet i paprekur nëse nuk ndërmerren hapa drastikë. Në këtë pikë, përgjegjësia bie edhe mbi qeverinë aktuale që të ndërmarrë masa të qarta për të goditur rrjetet korruptive, përndryshe, do të ketë pasoja të rënda në besueshmërinë e saj dhe në rrugëtimin e Maqedonisë së Veriut drejt integrimeve evropiane.
Partitë opozitare kanë intensifikuar thirrjet për zgjedhje të parakohshme. Duke pretenduar se Qeveria aktuale nuk i përfaqëson më interesat e qytetarëve, opozita po kërkon një rifreskim të legjitimitetit institucional. Pyetja që ngrihet është: a do të çojë një zgjedhje e re në zgjidhjen e problemeve të thella të vendit, apo thjesht do të përjetësojë një cikël të vjetër? E qartë është që një klimë politike e qëndrueshme është jetike për çdo vend që synon stabilitet dhe zhvillim të qëndrueshëm.
Një tjetër element i rëndësishëm është diskutimi mbi ndryshimet kushtetuese. Ndryshimet në Kushtetutë kërkojnë një qasje të kujdesshme dhe të balancuar, sepse një vendim i nxituar mund të ketë pasoja të papritura. Nëse Maqedonia e Veriut synon të përparojë drejt integrimit të plotë në Bashkimin Evropian, ndryshimet në ligjet bazë të vendit janë të pashmangshme. Çështja është: a janë liderët e përgatitur për të zbatuar këto ndryshime në mënyrë që të përfitojnë qytetarët dhe jo vetëm interesat e ngushta politike?
Futja e bullgarëve në Kushtetutë, një kërkesë e cila ka shkaktuar shumë polemika, është një hap që mund të ndikojë jo vetëm në politikën e brendshme, por edhe në marrëdhëniet ndërkombëtare të Maqedonisë së Veriut. Ky ndryshim mund të interpretohet si një përpjekje për të arritur një kompromis me Bullgarinë dhe për të hapur rrugën drejt integrimeve euroatlantike. Por çmimi që paguan vendi për këtë lëvizje është i rëndë dhe rrezikon të krijojë ndarje të reja sociale dhe kulturore.
Maqedonia e Veriut ndodhet përballë një epoke ku stabiliteti politik është thuajse “i kërcënuar”. Keqpërdorimet e kaluara, krimet dhe afera korruptive, kërkesat për zgjedhje të parakohshme, ndryshimet e mundshme kushtetuese dhe futja e bullgarëve në Kushtetutë janë të gjitha faktorë që do të përcaktojnë rrugën që do të marrë vendi në të ardhmen e afërt. Kjo situatë është një mundësi për të reflektuar mbi vlerat dhe prioritetet e vendit. Në fund të fundit, mbetet për t’u parë nëse ky “tërmet politik” do të prodhojë një bazë të re dhe më të fortë, apo do të çojë në një periudhë tjetër pasigurie dhe ndarjesh të thella. / © POPULLI.mk