Nëse ka një vend ku natyra e egër takohet me historinë e lashtë dhe mikpritja është më shumë se një traditë ,ai vend është Shqipëria.
Një copëz e vogël në zemër të Ballkanit, por me një shpirt të madh sa deti dhe malet që e rrethojnë. Brigjet e mrekullueshme të Rivierës Shqiptare, ku deti Jon përqafohet me bregun shkëmbor e plazhet me rërë të bardhë. Vlora,Orikumi,Himara, Dhërmiu, Jala, Borshi, Qeparoi, Saranda e Ksamili, emra që nuk janë thjesht destinacione, por përjetime.
Në mëngjes, dielli ngrihet ngadalë mbi det dhe e mbush ajrin me premtimin e një dite të paharrueshme. Drejt veriut, ku Adriatiku flet me një gjuhë të qetë e të ngrohtë, gjenden dy nga perlat më të ndritshme të bregdetit shqiptar: Shëngjini dhe Velipoja. Shëngjini, me plazhin e gjatë dhe ujërat e qeta, është një vend ku mund të ndjesh pushimet në kuptimin më të pastër të fjalës – relaks, diell dhe ajër deti që mbush mushkëritë me jetë.
Ky qytet i vogël bregdetar është kthyer në një strehë për ata që kërkojnë bukuri natyrore pa zhurmë, me pyje pranë bregdetit dhe perëndime që ngjajnë me piktura. Më në veri, Velipoja ofron një ndjesi të rrallë: rërë të imët e të artë që shtrihet pafund, një horizont të hapur dhe qetësi shpirtërore.
Këtu, deti duket sikur fton për reflektim, ndërsa natyra përreth ruan një autenticitet që gjithnjë e më pak gjendet sot. Është destinacioni ideal për familje, për çifte dhe për këdo që kërkon pushime me ritëm të ngadaltë dhe zemër të ngrohtë. Thethi dhe Valbona nuk janë vetëm male – janë poezi të gdhendura në shkëmbinj e pyje. E ndërsa ecën në shtigjet e tyre, çdo hap është një ftesë për të reflektuar, për të ndjerë, për të qenë vërtet i gjallë. Vazhdojmë në Durrës, qyteti antik buzë detit, është një tjetër stacion i domosdoshëm në hartën e pushimeve.
Qyteti bashkon hijeshinë e historisë me energjinë e sotme: mure romake, amfiteatër i lashtë, bulevarde të gjalla, dhe një bregdet që pulson gjatë gjithë verës. Plazhet e Durrësit janë të përshtatshme për të gjitha moshat, me rërë të imët, bare buzë detit dhe aktivitete të shumta për familjarë e të rinj.
Plazhet e Kavajës – Golem, Mali i Robit, Qerret, Spille – ofrojnë një kombinim perfekt mes gjelbërimit, resorteve moderne dhe detit që të fton të harrosh çdo shqetësim. Këto zona janë ndër më të preferuarat për pushime familjare dhe çdo vit mirëpresin mijëra vizitorë që kërkojnë relaks pa larguar shumë nga qyteti.
Bukuria e Shqipërisë nuk qëndron vetëm në peizazhet e saj. Është te buzëqeshja e ngrohtë, te gatimet që përfaqësojnë shekuj traditë, te këngët që përcillen brez pas brezi. Është një vend ku thjeshtësia është luks, ku koha ngadalësohet dhe çdo moment ka kuptim.
Shqipëria është një udhëtim i brendshëm. Një kujtesë se bukuria ndonjëherë gjendet aty ku askush nuk e pret. Një thirrje për të përjetuar jo vetëm një vend, por edhe një mënyrë tjetër të të jetuarit.