Presidenti i SHBA-së Donald Trump konfirmoi raportet se ai kishte folur së fundmi me presidentin autoritar të Venezuelës, Nicolás Maduro, në telefon, ndërsa tensionet midis dy vendeve rriten.
I pyetur në bordin e ”Air Force One” në lidhje me një raport të së premtes të ”New York Times”, ku thuhej se Trump zhvilloi një telefonatë me Maduron javën e kaluar, presidenti i SHBA-së tha se “nuk dua të komentoj për këtë. Përgjigjja është po”.
I pyetur për detaje të mëtejshme, Trump u përgjigj se “nuk do të thoja se shkoi mirë apo keq. Ishte një telefonatë”.
Gazetarët në bordin e ”Air Force One” pyetën gjithashtu nëse një sulm ajror në Venezuelë ishte i afërt, pasi Trump tha më parë gjatë javës se operacionet nga toka për të ndaluar trafikantët e dyshuar të drogës venezueliane do të fillonin shumë shpejt dhe se hapësira ajrore e vendit të Amerikës së Jugut duhet të konsiderohet e mbyllur.
“Mos kini iluzione”, u përgjigj Trump.
Komentet e Trump për gazetarët erdhën, ndërsa Maduro akuzoi Shtetet e Bashkuara se po përpiqeshin të merrnin kontrollin e rezervave të naftës së vendit të tij me praninë e tyre ushtarake në rritje në Karaibe.
Në një letër drejtuar Organizatës së Vendeve Eksportuese të Naftës (OPEC), Maduro tha se Uashingtoni donte të “konfiskonte rezervat e mëdha të naftës së Venezuelës, më të mëdhatë në planet, përmes forcës vdekjeprurëse ushtarake”.
”Ky kërcënim rrezikon paqen, sigurinë dhe stabilitetin rajonal dhe ndërkombëtar dhe paraqet rreziqe për prodhimin venezuelian dhe tregun ndërkombëtar të naftës”, tha ai.
Maduro tha se SHBA-të kanë mbledhur 15 000 trupa dhe 14 anije luftarake në Karaibe, një shifër trupash që përputhet me raportet e mediave amerikane.
SHBA-të nuk e konsiderojnë Maduron si një president legjitim.
Ashtu si BE-ja dhe shumë shtete të Amerikës Latine, ato vënë në dyshim rezultatin zyrtar të zgjedhjeve presidenciale të vitit 2024, të cilat u shoqëruan me akuza për mashtrim./ a.jor.