Reshjet e mëdha të shiut që kanë përfshirë ditët e fundit Kosovën pritet të lënë pasoja të rënda ekonomike për shumë familje, veçanërisht në zonat e Drenicës dhe Dukagjinit, informon POPULLI.mk
Lidhur me këtë situatë, aktori i njohur Fatmir Spahiu ka reaguar publikisht, duke shprehur gatishmërinë e tij për t’u angazhuar në iniciativa humanitare në ndihmë të familjeve të prekura nga vërshimet.
“Sikur edhe në të kaluarën, jam i gatshëm të marr pjesë si organizator, bashkëorganizator apo në çfarëdo forme tjetër në ndonjë ngjarje që do të grumbullonte mjete për familjet e dëmtuara”, ka deklaruar Spahiu.
Ai ka theksuar se një organizim i tillë duhet të bëhet në koordinim institucional dhe komunal, ndërsa grumbullimi i mjeteve financiare do të duhej të realizohej nga institucionet përkatëse, me përkrahjen e artistëve dhe qytetarëve.
Spahiu shprehu bindjen se një nismë e tillë do të gëzonte mbështetje të gjerë edhe nga artistë, sportistë dhe figura të tjera publike, duke nënvizuar rëndësinë e solidaritetit në kohë të vështira.
“Në këtë moment, lutemi që dëmet të jenë sa më të vogla. Si gjithmonë, jemi bashkë”, ka përfunduar ai. / © POPULLI.mk