Ngjarjet e fundit në Kumanovë, përfshirë djegien e disa veturave dhe zyrës së kryetarit të degës së BDI-së, Fitor Jakupi kanë ngritur shumë pikëpyetje lidhur me përgjegjësinë dhe qëllimet pas këtyre akteve.
Shkruan POPULLI.mk
Fillimisht, BDI akuzoi qeverinë e më shumë MPB, duke drejtuar gishtin kah zv.ministri Astrit Iseni nuk po e bën punën siq duhet, duke aluduar në një komplot politik për destabilizimin e partisë. Këto akuza të ashpra, të shoqëruara me deklarata publike të bujshme, synuan të rrisin presionin ndaj qeverisë dhe të tregojnë për një situatë të paqëndrueshme politike.
Megjithatë, zhvillimet e reja kanë hedhur dritë mbi një detaj tronditës: personi i dyshuar për këto akte thuhet të jetë i afërt me një anëtar të njohur të BDI-së, Xhelal Bajramin. Ky zbulim ka sjellë një kthesë të papritur në narrativën e ngjarjes, duke vënë në pikëpyetje qëndrimin dhe reagimin e partisë.
Reagimi i BDI-së në këtë pikë është vendimtar. Nëse partia zgjedh të heshtë ose të minimizojë ngjarjen, kjo mund të interpretohet si mungesë transparence dhe sinqeriteti. Nga ana tjetër, një qëndrim i qartë dhe i ashpër kundër autorit, pavarësisht lidhjeve të tyre, mund të ndihmojë në rikthimin e besimit të publikut. Ky incident ka nxjerrë në pah rëndësinë e integritetit në politikë dhe nevojën për të shmangur akuzat e pabazuara që mund të shndërrohen në bumerang. / © POPULLI.mk