Diskriminimi vazhdon të jetë një problem serioz në vend – dhe të rinjtë janë mes më të prekurve. Komisioni për Parandalimin e Diskriminimit bëri të ditur se shumica e ankesave lidhen me marrëdhëniet e punës, ndërsa etnia mbetet baza e dytë më e shpeshtë e diskriminimit, shkruan Alsat.
Kur bëhet fjalë për shkollat, raportohen raste të fëmijëve me nevoja të veçanta dhe sjellje të papërshtatshme, ndërsa paralajmërohet se edhe sporti nuk mbetet i paprekur nga paragjykimet dhe thirrjet ofenduese në tribuna. Ministrja e Arsimit, Vesna Janevska, apelon se arsimi është arma më e fortë kundër stereotipeve dhe padrejtësive, duke theksuar se diversiteti duhet parë si vlerë dhe se shoqëria duhet të ndërtohet mbi respekt dhe mirëkuptim. Këto u thane në promovimin e fushatës ‘Një ekip për çdo fëmijë, zero diskriminim’ në kuadër të shënimit të Ditës Botërore të Fëmijës, 20 Nëntor të organizuar nga UNICEF-i.
“Shumica e ankesave janë në fushën e marrëdhënieve të punës, baza e dytë është etnia, pastaj është aftësia e kufizuar, origjina sociale, por dominojnë ankesat që lidhen me marrëdhëniet e punës dhe e dyta pas tyre është etnia. Në rastin e të rinjve, ne marrim ankesa nga shkollat kur kemi fëmijë me nevoja të veçanta arsimore, fëmijë me, le të themi, sjellje të papërshtatshme. Këto janë shumica e ankesave. Ende nuk kemi marrë një ankesë për pjesëmarrjen në sporte në të cilat askush nuk ka qasje, por unë prapë besoj se përmes sportit duhet të punojmë për rritjen e ndërgjegjësimit dhe krijimin e unitetit, veçanërisht nga tribunat dhe midis vetë futbollistëve të rinj, ndodhin gjëra të padëshirueshme”, tha Dushan Tomshiq, kryetar I Komisionit për Parandalimin e Diskriminimit.
“Por për t’i shtypur stereotipet dhe për t’i shtypur padrejtësitë, mjeti kryesor dhe më i fuqishëm është arsimi. Dituria është ajo që do të na mësojë të respektojmë, të shohim ndryshimet si pasuri e jo si hendikep. Nga çdo gjë nga e cila mund të nxjerrim bukuri, duhet ta nxjerrim bukurinë. Prandaj, si ministre, shumë herë kam folur për gjithçka që bëjmë në programet mësimore dhe aktivitetet edukative, dhe personalisht, sa herë që flas, promovoj se ne të gjithë jemi të barabartë, se kemi një shtet që duhet ta ndërtojmë së bashku, plot respekt dhe mirëkuptim. E përsëris, arsimi është shtylla dhe arsimi është çelësi”, tha Vesna Janevska, ministre e Arsimit./ Alsat.mk