Çairi përfiton edhe dy projekte të rëndësishme zhvillimore me një vlerë të përgjithshme prej 1 milion e 150 mijë euro, të financuara drejtpërdrejt nga Qeveria përmes thirrjeve për investime kapitale, informon POPULLI.mk
Njëri prej projekteve është ndërtimi i një pishine moderne në lagjen Serovë, pranë Shkollës Fillore “Adem Jashari”, me një investim prej 1 milion euro. Pishina do të shërbejë si hapësirë për edukim fizik dhe rekreacion për nxënësit dhe të rinjtë e lagjes, duke përmirësuar ndjeshëm infrastrukturën sportive dhe arsimore në këtë pjesë të komunës.
Projekti i dytë përfshin rregullimin e rrugës “Nexhati Agolli”, përfshirë asfaltimin dhe përmirësimin e rrjetit të infrastrukturës nëntokësore. Ky investim kap vlerën prej 150 mijë euro dhe ka për qëllim përmirësimin e kushteve të jetesës për banorët e zonës.
Zëvendëskryeministri i parë dhe deputeti nga zona, Izet Mexhiti, thekson se këto janë vetëm fillimet e investimeve për Serovën dhe Çairin:
“Zhvillimi urban, arsimi cilësor dhe infrastruktura moderne do të mbeten prioritet yni i pandryshueshëm.”, është shprehur Mexhiti. / © POPULLI.mk