Në prezencë të studentëve bursistë, aktivistëve, udhëheqësisë dhe kryetarit të nderit të El Hilalit, prof.dr. Abdurauf Pruthi, sonte u ndanë bursat studentore të El Hilalit për vitin akademik 2022-2023. Gjithsejt 25 studentë sonte fituan të drejtën të jenë bursistë të organizatës El Hilal, e cila prej vitit akademik 2004-2005 pandërprerë realizon këtë aktivitet të rëndësishëm humanitar.
Në fjalimet që i mbajtëm para të pranishmëve, në mesin e të cilëve edhe rektori i Universitetit të Tetovës, prof.dr. Kushtrim Ahmeti dhe prorektori prof.dr. Ibrahim Neziri, theksuam rëndësinë e arsimit dhe ndihmës që u jepet studentëve të dalluar, që ka një qëllim motivues për ta.