Kryetari i komunës së Çairit, Visar Ganiu dhe ai i Likovës, Erkan Arifi, sot kanë bërë homazhe te varri i dëshmorit Imri Elezi, te varrezat e dëshmorëve në fshatin Mateç të Kumanovës.
“Sot, në 22 vjetorin e rënies së dëshmorit të kombit Imri Elezi me vendosjen e luleve tek varri i tij në fshatin Mateç përkujtuam veprimtarinë e bashkëqytetarit tonë i cili më 31 maj të vitit 2001 dha jetën për ne, për lirinë tonë, për të drejtat tona, për një ardhmëri më të ndritur të fëmijëve tanë. Imri Elezi do të jetë gjallë gjithmonë në zemrat tona. Lavdi Imri Elezit dhe të gjithë dëshmorëve të kombit!”, ka shkruar Ganiu.