Koreografi dhe valltari i njohur, Ilir Loku, ka reaguar publikisht pas koncertit të fundit të Ansamblit Shtetëror Shqiptar në Tetovë, duke kërkuar reflektim profesional mbi procedurat institucionale dhe standardet e vlerësimit të repertorit koreografik, informon POPULLI.mk
Në një shkrim të qasur në mënyrë miqësore, të matur dhe konstruktive, Loku thekson respektin për publikun e Tetovës dhe përkushtimin e vazhdueshëm të artistëve të ansamblit, duke nënvizuar se qëllimi i reagimit të tij nuk është gjykimi, por hapja e një dialogu profesional për forcimin e institucionit.
Sipas Lokut, Ansambli Shtetëror Shqiptar, si institucion me peshë të veçantë historike dhe identitare, mbart përgjegjësi artistike, pedagogjike dhe institucionale, ndërsa mënyra se si ndërtohet dhe miratohet repertori ndikon drejtpërdrejt në cilësinë artistike dhe besimin e publikut.
Ai vëren se gjatë koncertit në Tetovë u prezantuan dy koreografi të reja si premiera dhe se disa nga vërejtjet e evidentuara më herët në Shkup janë adresuar, gjë që, sipas tij, dëshmon gatishmëri për reflektim profesional dhe përbën një hap pozitiv përpara.
Megjithatë, Loku thekson se përmirësimet në skenë nuk e zbehin nevojën për shqyrtimin e procedurave institucionale që garantojnë cilësinë dhe qëndrueshmërinë e repertorit. Ai ngre pyetjen nëse këto koreografi kanë kaluar procesin e plotë të vlerësimit profesional nga një komision kompetent dhe i pavarur, siç kërkohet në institucionet shtetërore.
Sipas tij, transparenca mbi përbërjen e komisioneve dhe kriteret e vlerësimit është thelbësore për ruajtjen e profesionalizmit dhe besueshmërisë institucionale. Në të kundërtën, mungesa e procedurave të rregullta mund të cenojë integritetin artistik dhe institucional të ansamblit.
Loku thekson se çdo vepër koreografike që synon të bëhet pjesë e repertorit duhet të kalojë përmes disa fazave themelore: propozim artistik të argumentuar, analizë profesionale, vlerësim nga komision i pavarur dhe miratim institucional. Anashkalimi i këtyre hapave, sipas tij, rrezikon të dëmtojë standardet dhe imazhin publik të institucionit.
Në reagimin e tij, koreografi nënvizon se cilësia në institucionet kulturore nuk është rezultat i improvizimit, por i profesionalizmit, transparencës dhe meritokracisë. Ai gjithashtu vë në pah rolin e Ministrisë së Kulturës në monitorimin e proceseve institucionale, në përputhje me parimet e ligjshmërisë dhe standardet evropiane të qeverisjes kulturore.
Në përfundim, Ilir Loku thekson se reflektimet e tij nuk përbëjnë akuza, por një thirrje për dialog profesional, me qëllim forcimin e Ansamblit Shtetëror Shqiptar dhe ruajtjen e dinjitetit të trashëgimisë sonë skenike dhe identitetit kulturor. / © POPULLI.mk