Kryetari i Partisë Demokratike të Kosovës, Memli Krasniqi, ka shprehur ngushëllimet e tij të thella për ndarjen nga jeta të Haxhi Thaçit, babait të ish-presidentit Hashim Thaçi, informon POPULLI.mk
Në një mesazh prekës, Krasniqi e përshkroi Haxhi Thaçin si një figurë që mishëron sakrificën dhe vlerat e larta morale, duke theksuar se ai nuk ishte vetëm një baba, por një udhërrëfyes që la pas një trashëgimi të çmuar.
“Me ndarjen nga jeta të Haxhi Thaçit, ne nuk vajtojmë vetëm një baba; ne nderojmë një figurë jete që mishëroi sakrificën, mësimet e së cilës formësuan historinë dhe busulla e moralit të të cilit krijoi një lider historik,” tha Krasniqi.
Ai kujtoi një moment nga viti 1992, kur Haxhi Thaçi i dha një mesazh të fuqishëm të birit të tij, Hashimit:
“Biri im, e di që je futur thellë në punë të rënda. Por ki kujdes, për veten dhe më shumë për shokët e tu. Për Serbinë, mos u mërzit. Mos u korit.”
Krasniqi theksoi se këto nuk janë vetëm fjalët e një babai, por jehona e brezave të tërë të prindërve shqiptarë, të cilët e dinin se jeta nuk jetohet për veten, por për një qëllim më të lartë.
Duke vlerësuar ndikimin e Haxhi Thaçit në formësimin e udhëheqësit dhe çlirimtarit Hashim Thaçi, Krasniqi theksoi se Kosova u bekua me një lider, sepse fillimisht u bekua me një baba që besonte në detyrën e shenjtë të shërbimit ndaj popullit të tij.
Në fund, ai përçoi ngushëllimet për familjen Thaçi, duke nënvizuar se trashëgimia e Bacës Haxhi do të mbetet gjithmonë pjesë e historisë dhe vlerave mbi të cilat qëndron Kosova.
“Baca Haxhi u prehtë në paqe!” – përfundoi Krasniqi. / © POPULLI.mk