Dalëngadalë, struktura e BDI-së po tronditet nga brenda. Izet Mexhiti, kryetar i Lëvizjes Demokratike, një nga figurat kyçe të politikës shqiptare në Maqedoninë e Veriut, po dëshmon aftësinë e tij për të ndikuar thellësisht në ekuilibrin e brendshëm të partisë, duke shënuar një proces që mund të çojë në shkatërrimin e saj të plotë, shkruan POPULLI.mk
Së fundmi, një numër figurash të larta të BDI-së nga Saraji dhe jo vetëm kanë bërë një lëvizje të papritur dhe të guximshme duke u bashkuar me Lëvizjen Demokratike. Ky fenomen tregon se pakënaqësia brenda partisë po rritet, ndërsa figurat lokale po i kthejnë shpinën vizionit aktual të drejtimit të BDI-së.
Humbja e figurave të rëndësishme politike po e vendos BDI-në në një pozitë të vështirë dhe njëkohësisht tregon se forca politike e Mexhitit është ende e gjallë dhe në rritje. Nga ana tjetër, Blerim Bexheti, një nga aktorët kryesorë të partisë, po përballet me një dështim të dukshëm në vendin e tij, duke mos arritur ta ndalë këtë hemorragji politike. Kjo situatë i ka dhënë Mexhitit një platformë të fuqishme për të dëshmuar ndikimin e tij.
Edhe më befasuese është lëvizja e Muamet Hoxhës, ish-zëdhënës i Qeverisë, i cili gjithashtu i është bashkuar Lëvizjes Demokratike. Ky akt nuk është vetëm një humbje për BDI-në, por një tregues i qartë i një zhvendosjeje të madhe politike në kampin shqiptar.
A është kjo një kthesë historike në politikën shqiptare të Maqedonisë së Veriut? Duket se zhvillimet e fundit po paralajmërojnë një epokë të re, ku aleancat dhe balancat tradicionale po shemben për t’i hapur rrugë një qasjeje të re politike. / © POPULLI.mk