Mijëra protestues u mblodhën këtë të diel në qytetin serb të Kraljevës, duke vazhduar presionin ndaj presidentit Aleksandër Vuçiç, një ditë pasi ai njoftoi se do të japë dorëheqjen brenda pak javësh për t’i hapur rrugë zgjedhjeve të parakohshme presidenciale dhe parlamentare. Megjithatë, shumë qytetarë mbeten skeptikë se ai do të largohet realisht nga pushteti, ndërsa analistët vlerësojnë se mund të synojë postin e kryeministrit për të ruajtur ndikimin politik.
Protestat kundër Vuçiçit kanë vazhduar prej muajsh, të udhëhequra nga studentët, pas tragjedisë në stacionin hekurudhor të Novi Sadit në fund të vitit 2024, ku humbën jetën 16 persona. Demonstruesit e konsiderojnë ngjarjen simbol të korrupsionit dhe keqmenaxhimit qeveritar, akuza që presidenti serb i ka mohuar vazhdimisht. Në tubimin e Kraljevës, qytetarët kërkuan ndryshim, duke e cilësuar situatën aktuale të papranueshme.
Zhvillimet në Serbi po ndiqen me vëmendje nga Bashkimi Evropian dhe Rusia. BE-ja ka shprehur shqetësim për përdorimin e forcës ndaj protestuesve, lirinë e medias dhe pavarësinë e gjyqësorit, ndërsa rikujton se Serbia duhet të forcojë shtetin e së drejtës, të luftojë korrupsionin, të garantojë zgjedhje të lira dhe të normalizojë marrëdhëniet me Kosovën për të avancuar në procesin e integrimit evropian.
