Kryetari i Aleancës për Shqiptarët, Arben Taravari, përmes një mesazhi publik ka shprehur mirënjohje dhe krenari për strukturat e partisë dhe të gjithë ata që qëndruan të palëkundur në vendimin për dalje nga Qeveria.
“Jam krenar për secilin nga ju që jeni pjesë e Aleancës për Shqiptarët! Jam krenar për të gjithë ju që qëndruat të fortë në daljen tonë nga Qeveria!”, u shpreh Taravari, duke dërguar një mesazh të qartë edhe për ata që, sipas tij, përpiqen të krijojnë perceptimin e përçarjes brenda subjektit.
“Atyre që mundohen të na bëjnë të dukemi të përçarë, ju them se – seriali juaj nuk ka sukses!”, theksoi Taravari, duke nënvizuar se partia që ai udhëheq është “krenarisht më e fortë se asnjëherë”.
Në fund të reagimit të tij, ai rikujtoi fitoren në zgjedhjet lokale, duke e përforcuar mesazhin e unitetit: “Mos harroni: Jemi fituesit e Tetorit!”