Hetuesit e Kombeve të Bashkuara akuzuan Izraelin se ka kryer gjenocid në Rripin e Gazës me qëllim të “shkatërrimit të palestinezëve” dhe fajësuan kryeministrin izraelit dhe zyrtarë të tjerë të lartë për nxitje. Komisioni i Pavarur Ndërkombëtar i Hetimit i OKB-së konstatoi se “gjenocidi po ndodh në Gaza dhe vazhdon të ndodhë”, tha kryetarja e komisionit. Hetuesit theksuan se që nga tetori i vitit 2023 autoritetet dhe forcat izraelite kanë kryer “katër nga pesë veprat e gjenocidit” të përcaktuara në Konventën për parandalimin dhe ndëshkimin e gjenocidit. Sipas raportit, deklaratat e hapura të autoriteteve civile dhe ushtarake izraelite, të shoqëruara me modelin e sjelljes së forcave izraelite, “tregojnë se veprat e gjenocidit janë kryer me qëllim të shkatërrimit të palestinezëve në Rripin e Gazës si grup”.
“Komisioni arrin në përfundimin se autoritetet izraelite dhe forcat e sigurisë izraelite kanë qëllimin gjenocidal për të shkatërruar, tërësisht ose pjesërisht, palestinezët në Rripin e Gazës. Komisioni konstaton se udhëheqësit politikë dhe ushtarakë të Izraelit janë agjentë të Shtetit të Izraelit. Prandaj, veprimet e tyre i atribuohen Shtetit të Izraelit. Prandaj, Komisioni arrin në përfundimin se shteti i Izraelit mban përgjegjësi për dështimin për të parandaluar gjenocidin, për kryerjen e gjenocidit dhe për dështimin për të ndëshkuar gjenocidin kundër palestinezëve në Rripin e Gazës”, deklaroi Navi Pillay, Komisioni hetues i OKB-së. /Alsat.mk