Të 27 vendet anëtare të Bashkimit Evropian janë dakorduar për pakon e 18-të të sanksioneve ndaj Rusisë, si përgjigje ndaj agresionit të vazhdueshëm në Ukrainë, raportojnë diplomatë për agjencinë DPA.
Kjo paketë e re sanksionesh synon sektorin financiar dhe atë energjetik të Rusisë, dhe vjen pas refuzimit të presidentit rus, Vladimir Putin, për të pranuar një armëpushim pa kushte.
Fillimisht, Sllovakia kishte bllokuar miratimin e paketës për shkak të shqetësimeve lidhur me importin e gazit. Megjithatë, kryeministri Robert Fico deklaroi dje se ka urdhëruar përfaqësuesit sllovakë ta mbështesin masën, duke theksuar se çdo bllokim i mëtejshëm do të ishte “kundërproduktiv” për interesat e Sllovakisë si vend anëtar i BE-së.
Sipas rregullave të BE-së, të gjitha vendet anëtare duhet të japin miratimin e tyre për zbatimin e sanksioneve të reja.