Presidenti rus, Vladimir Putin, tha në një intervistë të botuar sot se Rusia do të marrë kontrollin e plotë të rajonit Donbas të Ukrainës me forcë nëse forcat ukrainase nuk tërhiqen, gjë që Kievi e ka hedhur poshtë kategorikisht.
Putini dërgoi dhjetëra mijëra trupa në Ukrainë në shkurt të vitit 2022, pas tetë vitesh konflikti midis separatistëve pro-rusë dhe forcave ukrainase në Donbas, i cili përbëhet nga rajonet e Donetskut dhe Luhanskut.
“Ose do t’i çlirojmë këto territore me forcën e armëve, ose forcat ukrainase do të largohen nga këto territore”, tha Putin për revistën javore India Today përpara vizitës së tij në New Delhi, sipas një videoje të transmetuar në televizionin shtetëror rus.
80 përqind e rajonit të Donetskut është nën kontrollin rus.
Ukraina thotë se nuk dëshiron t’i japë Rusisë territor që Moska dështoi ta pushtojë në fushën e betejës, dhe Presidenti ukrainas Volodymyr Zelensky ka thënë se Moska nuk duhet të shpërblehet për luftën që filloi.
Rusia aktualisht kontrollon rreth 19.2 përqind të Ukrainës, duke përfshirë gadishullin e Krimesë që aneksoi në vitin 2014, Oblastin e Luhanskut, 80 përqind të Donetskut, rreth 75 përqind të Khersonit dhe Zaporizhias, dhe pjesë më të vogla të Oblasteve të Kharkivit, Sumit, Mykolaivit dhe Dnipropetrovskit.
Rreth 5,000 kilometra katrorë të Donetskut janë ende nën kontrollin e Ukrainës. Në diskutimet me Shtetet e Bashkuara mbi draftin e një marrëveshjeje të mundshme paqeje për t’i dhënë fund luftës, Rusia ka deklaruar vazhdimisht se dëshiron kontroll mbi të gjithë Donbasin dhe se SHBA-të duhet ta njohin jozyrtarisht kontrollin e Moskës.
Rusët pretendojnë se kanë pranuar disa propozime amerikane
Në vitin 2022, Moska i shpalli rajonet Luhansk, Donetsk, Kherson dhe Zaporizhzhya pjesë të reja të Federatës Ruse pas referendumeve që Perëndimi dhe Kievi i hedhin poshtë si të rreme. Shumica e vendeve i konsiderojnë këto provinca dhe Krimenë territor ukrainas.
Putin priti në Kremlin të dërguarit amerikanë Steve Witkoff dhe Jared Kushner më herët këtë javë dhe tha se Rusia kishte pranuar disa propozime të SHBA-së për Ukrainën dhe se negociatat duhet të vazhdojnë.
Agjencia shtetërore ruse e lajmeve RIA citoi Putinin të ketë thënë se takimi i tij me Witkoff dhe Kushner ishte “shumë i dobishëm” dhe i bazuar në propozimet që ai dhe Presidenti i SHBA-së Donald Trump diskutuan në Alaska në gusht.