Në fakt, futbollisti Xherdan Shaqiri nuk donte të fliste fare për diskutimet rreth trajnerit te FC Baselit.
Por një keqkuptim gjatë intervistës e nxori nga vetja kapitenin e Baselit.
Në zonën e intervistave, kur gazeta zvicerane “Blick” vuri në dukje se fitorja 4:3 ndaj FC Zurich tregonte se skuadra nuk po luante kundër trajnerit, Shaqiri e kuptoi ndryshe pyetjen dhe reagoi menjëherë:
“E shoh pak të panevojshme që po e thoni këtë”, tha Shaqiri.
Më pas, ai doli hapur në mbrojtje të trajnerit Ludovic Magnin (46), për të cilin ndeshja në Zurich ishte vendimtare për të ardhmen e tij:
“Ludo po e bën shumë mirë punën e tij. Shihet qartë që po kënaqet këtu.
Të gjithë shkojmë çdo ditë në stërvitje me shumë entuziazëm dhe përpiqemi ta tregojmë këtë edhe në fushë”.
“Këto fjalë mund të shihen si një mbrojtje e qartë e trajnerit nga lojtari më i rëndësishëm i FC Baselit.
Por para se të fliste, Shaqiri kishte bërë gjithçka në fushë për ta mbajtur Magninin në detyrë: tre gola dhe një asistim – një shfaqje e madhe personale e Shaqirit, që i la lojtarët e Zurich-ut shpesh vetëm spektatorë.
Shembull i kësaj ishte goditja e lirë mjeshtërore që çoi në golin e Philip Otele (26) për rezultatin 3:2. Shaqiri, mbrojtësi Dominik Schmid (27) dhe Otele e kishin diskutuar këtë skemë gjatë ndeshjes.
“E provuam një herë në grumbullim dhe na doli keq,” tha Shaqiri me buzëqeshje pas ndeshjes.
“Por pashë që distanca ishte perfekte dhe u thashë të tjerëve se do ta provoja sërish.”
Dhe funksionoi – njësoj si reagimi i skuadrës pas paraqitjes zhgënjyese në Salzburg. Sipas Shaqirit, skuadra donte patjetër të luante mirë për tifozët që kishin udhëtuar atje:
“Tani ata po kthehen në Basel me një ndjenjë të mirë. Kjo është shumë e rëndësishme edhe për ne”.