Sipas legjislacionit aktual në Maqedoninë e Veriut, punëtorët në sektorin privat kanë të drejtë të përfitojnë shpërblimin e njohur si K-15, ose rroga e 13-të, e cila është e barabartë me të paktën 40% të pagës mesatare në vend. Për vitin 2024, kjo shumë arrin në minimum 16.800 denarë, bazuar në pagën mesatare aktuale. Ky shpërblim synon të lehtësojë situatën financiare të punonjësve dhe të përmirësojë standardin e tyre të jetesës, sidomos në prag të fundvitit, informon POPULLI.mk
Në anën tjetër, sektorit publik, që përfshin rreth 84 mijë administratorë shtetërorë, do t’u shpërndahet një shumë fikse prej 11.000 denarësh si bonus fundviti. Ky vendim për bonusin për administratën është marrë për të krijuar një balancë në shpërblimet ndërmjet sektorit publik dhe atij privat.
Sfidat ekonomike të këtij viti dhe rritja e inflacionit kanë bërë që këto shpërblime të jenë të mirëpritura nga punonjësit në të dy sektorët, por gjithashtu kanë ngjallur diskutime mbi nevojën për reformim dhe rritje më të drejtë të shpërblimeve, duke marrë parasysh dallimet e theksuara në lartësinë e tyre. Ndërsa për sektorin privat shpërblimi përcaktohet bazuar në përqindje të pagës mesatare, në sektorin publik vlera është e njëjtë për të gjithë, pavarësisht nivelit të pagave individuale.
Këto shpërblime pritet të shpërndahen deri në fund të vitit, duke u bërë pjesë e një tradite që synon të lehtësojë barrën financiare dhe të rrisë motivimin e punonjësve në të gjithë vendin.
© POPULLI.mk