Omer Ajdini, deri më tani Sekretar për Marrëdhënie me Jashtë në Aleancën për Shqiptarët, ka njoftuar se nuk është më pjesë e kësaj partie. Në një reagim publik, Ajdini ka theksuar se nuk mund të pajtohet me drejtimin që ka marrë partia, duke e cilësuar zhgënjyes dhe të kundërt me idealet fillestare, informon POPULLI.mk
Ai ka kritikuar ashpër vendimin e lidershipit të ASH-së për të mbështetur Erkan Arifin në Likovë, pas – siç tha – tetë viteve të keqqeverisjes së tij dhe dy dekadave të BDI-së.
“Kam pranuar të jem Sekretar për Marrëdhënie me Jashtë, edhe përkundër angazhimeve të shumta profesionale, vetëm e vetëm që ta ndërtonim një parti shprese për ndryshim. Por shpresën time e kthyen në zhgënjim, ëndrrat tona i shtypën me të dyja këmbët. Kjo nuk është partia që unë kam shpresuar ta shoh”, ka deklaruar Ajdini.
Ai theksoi se nuk është më as pjesë e Aleancës për Shqiptarët dhe as e ndonjë partie tjetër, ndërsa theksoi se “ASH-ja e vërtetë” për të do të mbetet ajo organizatë që dikur bashkoi të rinjtë në idealet për ndryshim dhe luftën kundër të keqes.
“Unë atë që e kam pështy nuk e lëpij, për asnjë çmim dhe me asnjë justifikim. Politika para së gjithash kërkon fytyrë dhe moral, dhe unë këtë nuk jam në gjendje t’ia fal askujt”, përfundoi Ajdini.