Edhe pse fushata për zgjedhjet presidenciale ende nuk ka filluar, kundërshtarët politik këto ditë vazhdimisht po sulmojnë kandidatët për president. Nga VMRO-DPMNE edhe sot me kritika për Pendarovskin se ai paraprakisht nuk ka pranuar ndryshim të Kushtetutës, ndërsa tani kërkon që të pranohen ndryshimet kushtetuese që i kërkon Bullgaria.
“Pendarovski personalisht është përfaqësues kryesor i idesë për ndryshimin e Kushtetutës, edhe vetë ka thënë se ai ka qenë personi që ka negociuar aneksin që vetë e quan diktat bullgar. Kur Pendarovski gënjente, kur pohonte se është jashtë mendjes së shëndoshë që të ndryshohet Kushtetuta ose tani kur është lobisti kryesor për ndryshimin e Kushtetutës? A ka ndonjë qëndrim të cilin nuk e ka ndryshuar Pendarovski?”, tha Mile Lefkov, VMRO-DPMNE.
Por as nga LSDM nuk mbetën pa kritikuar kandidatin e DPMNE-së. Thonë se Siljanovska Davkova po i zbaton politikat e VMRO-DPMNE-së për bllokimin e rrugës europiane të vendit.
“Atë që ofrojnë DPMNE dhe Siljanovska është që të heqim dorë nga e ardhmja, nga shpresa, të izolohemi dhe të përshëndetemi me çdo ndryshim të vërtetë dhe thelbësorë për një të nesërme më të mirë. Siljanovska Davkova rregullisht i zbaton politikat e DPMNE-së, të bllokadës dhe ndalimit të rrugës europiane në Kuvendin e Maqedonisë. Po rreshtohet në mënyrë të drejtpërdrejtë kundër Marrëveshjes së Prespës dhe Kornizës negocuese për hyrje në BE. Qytetarët po e shohin se Siljanovska është reprizë e Ivanovit”, tha Bogdanka Kuzeska, LSDM.
Për dallim nga ajo që dëgjuam edhe nga VMRO-DPMNE edhe nga LSDM, në bllokun politik shqiptarë është më qetë dhe nuk ka retorikë të tillë. Koalicioni që u reshtua pas kandidaturës së Taravarit nuk po e kritikon Osmanin, e as BDI-ja këtë gjë nuk po ia bën kandidatit të koalicionit VLEN. Ata kryesisht i drejtohen qytetarëve me kërkesë për mbështetje. Me tone më të qeta janë edhe nga partitë e kandidatëve të tjerë për president siç janë Biljana Vankovska, me mbështetjen e Levicës, Maksim Dimitrievski, kryetarë i ZNAM dhe Stevçe Jakimovski kryetarë i GROM-it.
Burimi / TV21