Kryetari i Lëvizjes BESA, Bilall Kasami, ka theksuar dallimet thelbësore që ekzistojnë mes periudhës kur BDI ishte në koalicion me VMRO-DPMNE-në e Gruevskit dhe periudhës aktuale, kur në qeveri është VMRO e Mickoskit në koalicion me partnerin shqiptar VLEN. Kasami ka theksuar se ky ndryshim është shumë më i thellë sesa thjesht një çështje e ndryshimit të liderëve politikë, duke u fokusuar në ndryshimin e qasjes dhe politikave ekonomike që karakterizojnë periudhat e ndryshme të qeverisjes.
Një nga dallimet më të dukshme është projekti “Shkupi 2014” i Nikolla Gruevskit, i cili njihet për shpërdorimin e fondeve të mëdha për projekte monumentale që kishin për qëllim të rindërtonin një histori të re për maqedonasit. Ky projekt, që njihet si një ndër investimet më të diskutueshme në periudhën e Gruevskit, flitet të ketë kushtuar ndërmjet 500 milionë deri në 1 miliardë euro. Projektet e “Shkupit 2014” shpesh janë kritikuar për shpenzime të tepruara dhe përfitime të drejtpërdrejta për pushtetarët dhe ata që kishin lidhje me ta, duke krijuar mundësi për abuzim me paratë publike dhe për pastrim parash përmes kontratave të mëdha të ndërtimit dhe infrastrukturës. Ky program u shoqërua gjithashtu me akuzat për manipulim të historisë dhe identitetit kombëtar të Maqedonisë.
Në ndryshim të plotë, koalicioni aktual qeverisës ku bën pjesë VLEN, kanë prezantuar një projekt të ri, një kredi hungareze prej 1 miliardë euro, ku 500 milionë euro do të ndahen për komunat dhe investime në infrastrukturë, ndërsa pjesa tjetër, 500 milionë euro, do të përdoren për mbështetje të bizneseve, duke ofruar kredi për zhvillimin e sektorit privat. Ky projekt është prezantuar si një mundësi për të stimuluar zhvillimin e vendit, duke u fokusuar në mbështetje të komunave dhe bizneseve për të krijuar mundësi të reja pune dhe zhvillim ekonomik të qëndrueshëm.
Një nga elementët më të rëndësishëm të këtij investimi është ndarja e 4 milionë euro për komunën e Tetovës, një ndihmë konkrete që ka si synim mbështetje për zhvillimin e qytetit dhe përmirësimin e kushteve të jetesës për qytetarët.