Paraqitja dinjitoze nuk mjafton për Kanadanë, që bëri një tjetër ndeshje të bukur, por mori një tjetër humbje, këtë herë 4-1 ndaj Kroacisë dhe u bë skuadra e dytë që eliminohet edhe matematikisht, pas Katarit dy ditë më parë.

Kanadezët e nisën vrullshëm dhe kaluan të parët në avantazh me anë të Alphonso Davies, por nën-kampionët e botës përmbysën gjithçka në pjesën e parë me anë të Kramaric e Livajës. Në pjesën e dytë Kramaric dhe Majer shënuan edhe golin e tretë e të katërt për kroatët, duke i ngjitur në kuotën e 4 pikëve, bashkë me Marokun.

Sfida e fundit e Kroacisë do të jetë ndaj Belgjikës, aty ku ballkanasit kanë nevojë vetëm për një pikë që të sigurojnë kalimin më tej, ndërsa Kanadaja do të përballet me Marokun me shpresën për ta mbyllur me të paktën një fitore rrugëtimin në Katar.

Kupa e Botës
Katar 2022
Grupi F

KROACI-KANADA 4-1 (Kramaric 36′, Livaja 44′, Petkovic 70′, Majer 94′ / Davies 2′)

adv

Dita e tetë e Kupës së Botës, Katar 2022 nisi me surpriza.

Kosta Rika, pas humbjes së thellë në ndeshjen e parë ndaj Spanjës “nxori” mësime dhe triumfoi ndaj Japonisë, ndaj një kundërshtari që në premierë mori suksesin e plotë ndaj Gjermanisë.

Skuadra e Suarez triumfoi 0-1 ndaj aziatikëve, me një gol që erdhi në të parën goditje në kuadrat 10 minuta nga fundi i kohës së rregullt.

Pjesa e parë u mbyll pa gola dhe pa asnjë goditje në portat respektive.

Shumë gjëra ndryshuan në fraksionin e dytë, me Japoninë që dominoi në çdo aspekt, pasi krijoi 10 raste shënimi dhe kishte kontrollin e topit, por nuk ia doli për të gjetur recetën e golit.

Në krahun tjetër, Kosta Rika mendoi më shumë për mbrojtjen dhe me kalimin e minutave, të dyja përfaqësueset menduan më shumë për prapavijën dhe skuadrat u “pushtuan” nga ndjenja e frikës për të mos pësuar.

Në një nga daljet e pakta, skuadra e Suarez gjeti fundin e rrjetës me anë të Fuller në minutën e 81-të duke shtangur japonezët.

Aziatikët vendosën të gjitha mekanizmat në lëvizje për të evituar humbjen, ndërsa në minutën e 88-të, Keylor Navas ishte heroi i përfaqësueses së tij me një pritje të dyfishtë.

Në fund 0-1 dhe Kosta Rika shijon pikët e para të grupit dhe jo vetëm, pasi tani në këtë grup gjithçka është e hapur, pasi kjo sfidë çon ujë në mullirin e Gjermanisë që në mbrëmje do të luajë ndaj Spanjës.

Japoni-Kosta Rika (0-1)

adv

Argjentina siguron suksesin e parë në Kupën e Botës, Katar 2022, por përfaqësuesja “Albiceleste” i falet përsëri kapitenit dhe njeriut lider, Lionel Messi-t.

7 herë fituesi i “Topit të Artë” ishte përcaktues në triumfin ndaj Meksikës, në një sfidë shumë të ekuilibruar dhe ndaj një kundërshtar shumë të mobilizuar në mbrojtje.

Pjesa e parë u mbyll pa gola, në një fraksion ku meksikanët provuan të testonin mbrojtjen argjentinase, ndërsa të besuarit e Scaloni-t u treguan të saktë në prapavijë, por jo kërcënues në portën e Meksikës.

Fraksioni i dytë solli një panoramë tjetër, me Argjentinën që e zhvendosi kundërshtarin në metrat e fundit, duke dominuar në çdo aspekt dhe pse goditjet në portë ishin pika më e dobët e Messi-t me shokë.

Në mesin e pjesës së dytë, në minutën e 64-të Messi veshi “kostumin” e superheroit, duke realizuar një perlë të vërtet nga distance, një gol personal dhe një gol “alla” Messi, me numrin 10-të I cili jo vetëm u çlirua në aspektin personal, por ndryshoi të gjithë mentalitetin e skuadrës.

“Pleshti” shënoi golin e dytë në këtë Botëror dhe të tetin në karrierën e tij duke barazuar legjendën Diego Armando Maradona, por edhe rivalin e tij të përjetshëm, Cristiano Ronaldo.

1-0 dhe meksikanët provuan të reagonin, por e kishin të vështirë, me Argjentinën që provoi kundërsulmin, por goli i dytë erdhi nga një goditje e gjitha personale e talentit Enzo Fernandez.

Futbollisti i Benfica-s shënoi në minutën e 87-të duke vulosur ndeshjen, ndërsa për të ishte një gol për tu vendosur në “kornizë”, pasi ishte goli i parë me përfaqësuesen në ndeshjen numër pesë për të.

Në fund asgjë nuk ndryshoi në rezultat, por  në renditje po. Tani Argjentina katapultohet në vendin e dytë të Grupit C me 3 pikë, një më pak se Polonia që kryeson me 4 dhe do të jetë kundërshtari i radhës, ndërsa Meksika zbret në vendin e fundit me 1 pike, dy më pak se Arabia Saudite, kundërshtari i radhës për ta.

adv