Nga nesër fillon vaksinimi falas kundër gripit sezonal. Imunizimi do të bëhet në qendrat e shëndetit publik në mbarë vendin, ndërsa në Shkup në Poliklinikat Idadija, Bit Pazari dhe Gjorçe vetëm në turnin e dytë, përcjell FLAKA.
Ministria e Shëndetësisë bën të ditur se deri më tani për vaksinën kanë aplikuar 27 mijë qytetarë nga grupet e rrezikut, ndërsa në dispozicion janë edhe 13 mijë doza. Vetëm ditën e djeshme janë dërguar 12 mijë ftesa përmes “Terminit tim” për kohën dhe në cilën pikë duhet të thërrasin personat e interesuar mbi 65 vjeç, të sëmurët kronikë, gratë shtatzëna, punonjësit e shëndetësisë dhe fëmijët deri në 5 vjeç për t’u vaksinuar.
“Grupet e rrezikut mund ta kenë më të vështirë nëse infektohen me grip sezonal, sepse infeksioni me Covid është ende i pranishëm në vendin tonë, kështu që mund të ndodhin komplikime”, tha dr. Lulzime Bajrami, epidemiologe në QPSH Shkup.
Përveç vaksinave falas nga Ministria e Shëndetësisë, deri në fund të javës në Shkup do të fillojnë edhe vaksinimet komerciale me çmim prej 800 denarë. FLAKA