Para fillimit të vitit të ri shkollor, Qeveria sot ka miratuar masën “Shporta Shkollore”, me qëllim lehtësimin e shpenzimeve të familjeve dhe mbrojtjen e buxhetit familjar.
Zëdhënësja e Qeverisë, Venera Azizi, theksoi se kjo masë synon që furnizimi me pajisjet e nevojshme shkollore të jetë më i përballueshëm për çdo familje. Në kuadër të “Shportës Shkollore” parashikohen të paktën 10% ulje në tregtinë me shumicë dhe të paktën 15% ulje në tregtinë me pakicë.
Masa përfshin çanta, fletore, lapsa, ngjyra, materiale kreative, mjete shkollore dhe kategori të tjera të nevojshme për nxënësit.
Për të garantuar transparencë dhe për t’u mundësuar qytetarëve që ta shohin qartë përfitimin, çmimi i mëparshëm dhe çmimi i ri i ulur do të paraqiten qartë.
“Shporta Shkollore” do të zbatohet deri më 30 shtator 2026, duke mbuluar periudhën kur familjet realizojnë furnizimet për fillimin e vitit të ri shkollor.
“Çdo kursim për familjen ka rëndësi. Si Qeveri, po marrim masa konkrete që lehtësimi i shpenzimeve të ndihet drejtpërdrejt në buxhetin e qytetarëve. Prindërit duhet të kenë mundësi t’i sigurojnë fëmijëve të tyre mjetet e nevojshme për shkollë, pa barrë të panevojshme për familjen”, u shpreh zëdhënësja e Qeverisë, Venera Azizi.
Qeveria mbetet e përkushtuar ndaj masave që mbrojnë standardin jetësor të qytetarëve dhe ofrojnë mbështetje konkrete për familjet.
