Bashkimi Demokratik për Integrim do të mbajë sot vazhdimin e seancës konstituive të përbërjes së re të Kryesisë Qendrore të partisë në selinë e partisë në Mala Reçicë.

adv

Zëvendëskryeministri për Çështje Ekonomike, Fatmir Bytyqi, kërkoi nga KRRE dhe EVN-Home, të merren me kompanitë që ilegalisht kaluan nga tregu i lirë në atë të rregulluar të energjisë elektrike. Bëhet fjalë për qindra kompani që e kanë shmangur ligjin dhe kanë blerë energjinë elektrike me çmim më të lirë, duke paguar kështu TVSH më të ulët. Ende askush nuk e ka zbuluar listën e kompanive dhe jozyrtarisht mes këtyre subjekteve ka pasur edhe komuna.

“Ka dikush që do të zbulojë listën e atyre që kaluan gabimisht nga një treg i hapur në një treg të rregulluar të energjisë elektrike dhe gjithçka do të ndodhë në kohën e duhur. U kemi bërë thirrje të gjitha organeve kompetente që të veprojnë ashtu siç duhet sipas ligjit. Nëse dikush ka bërë diçka që nuk është e ligjshme, ju e dini se ku është përgjigja. Fatkeqësisht, shpesh kërkohen përgjigje nga unë personalisht dhe nga pushteti ekzekutiv, por duhet të kuptojmë njëherë e mirë se pushteti ekzekutiv është i ndarë me pushtetet e tjera dhe secili duhet të bëjë atë që e ka obligim dhe kompetencë me ligj”, u shpreh Fatmir Bytyqi – Zëvendëskryeministër për Çështje Ekonomike.

Tani për tani nuk ka zgjidhje për rastin dhe jozyrtarisht këto kompani janë ende në tregun e rregulluar, në vend të tregut të lirë. Sipas kreut të EMV-së, Vasko Kovaçevski, këto kompani në tregun e rregulluar paraqesin barrë për sistemin, por edhe për çmimin për amvisëritë.

Sipas informacioneve në media, mbi dy mijë kompani, përmes themelimit të kompanive vartëse, kanë shfrytëzuar matësit e tyre dhe në këtë mënyrë janë furnizuar me energji elektrike më të lirë. Këtu bëjnë pjesë kompani industriale, tregje zinxhirore, farmaci, kazino, kompani sigurimesh, si dhe komuna.

Rasti është duke u shqyrtuar nga Policia Financiare, nga ku kanë thënë se të gjitha informacionet e grumbulluara do t’i dorëzojnë në Prokurori.

adv

Ulja e temperaturave ka bëre që qytetarët e kryeqytetit, por jo vetëm, të thithin ajër më të ndotur. Ajo për të cilën institucionet alarmuan gjatë verës tashmë po ndodh. Shtrenjtimi i peletave, drurit për ngrohje dhe energjisë elektrike shtyn qytetarët që kërkojnë alternativa më të lira për ngrohje të cilat kanë bërë që kryeqyteti ditët e fundit të qëndrojë shumë lart në listën ku renditen qytetet më të ndotura. Ministri i Ekologjisë, Naser Nuredini, nuk mohon faktin se ndotja është shtuar, mirëpo thotë se qytetarët duhet të kenë kujdes se cilat aplikacione kontrollojnë pasi së fundmi kjo është shndërruar edhe në biznes. Pasqyra më e saktë e cilësisë së ajrit, thotë Nuredini, bëhet tek air.moeep.gov.mk

“Në periudhën e dimrit kemi problem gjithmonë me ndotje, për shkak të transportit të shtuar, ngrohjets dhe të tjera si këto. Kemi bërë edhe studimin bashkë me UNDP-në dhe përkrahjen e shteti suedez dhe kemi bërë hulumtime, andaj jemi të vetëdijshëm se nga ku buron ajo ndotje”, deklaroi Naser Nuredini- Ministër i Mjedisit Jetësorë.

Aplikacionet që nuk janë në kompetenca të Ministrisë së Ekologjisë ditët e fundit e kanë renditur Shkupin në grupin e pesë qyteteve më të ndotura në botë. Por, ajri në vend monitorohet nga disa stacione matëse të vendosura nga shteti, vlera e secilit prej tyre shkon mbi 100 mijë euro. Sot përsëri faqja e ministrisë për monitorimin e ajrit nuk funksiononte. Pak kohë më parë u investua një shumë e madhe parash për të blerë server të ri, sepse i vjetri herë pas here nuk funksiononte. Sipas ministrit here pas here e njëjta del jashtë përdorimit, sepse bëhet zëvendësimi i serverit. Shtrenjtimi I gazit dhe lëndëve të tjera për ngrohje, ka bërë që edhe institucionet të gjejnë zgjidhjen tek përdorimi I mazutit. Ditët e fundit në qytetet si Shkup, Tetovë, Gostivar, qytetarët janë ankuar se ndiejnë aromë të djegie lëndësh plastike.

adv

Ministri i Ekonomisë, Kreshnik Bekteshi, pret ulje të çmimit të produkteve ushqimore bazë nga pesë në 12-13 për qind në fillim të dhjetorit. Nëse nuk ka një ulje të tillë, siç tha ai sot pas takimit me prodhuesit dhe përfaqësuesit e tregjeve më të mëdha zinxhirore, do të miratohen masat e reja që dalin nga Ligji i Tregtisë.

“Ajo që ishte barra më e madhe për kompanitë është zgjidhur. Për këtë arsye ne në vazhdimësi mbajmë takime me prodhuesit e produkteve ushqimore bazë. Ata mund të paraqesin propozimet e tyre dhe kjo, me kërkesën time, duhet të ndodhë javën e ardhshme. Aty ku ka mundësi do të ndërhyjnë institucionet kompetente. Megjithatë, sipas të gjitha projeksioneve dhe analizave, pres një ulje të tillë pothuajse në çdo produkt të shënuar në Vendimin e Drejtorisë doganore. Po, mund të ndodhë që të ketë rritje të çmimit të lëndëve të para të importuara, por sigurisht që ka mekanizma të caktuar për ta stabilizuar atë dhe nëse ky është problemi për ulje shtesë të çmimeve, ne jemi gati që edhe kjo të bëhet, por së pari duam të shohim se ka një vullnet që kriza të mos jetë barrë e qytetarëve, pra konsumatorëve, por që ta shpërndajmë të gjithë”, theksoi ministri.

Ai po ashtu përmendi se qytetarët mund të lajmërohen në baza ditore në Inspektoratin Shtetëror të Tregut nëse vërejnë se diku nuk ka ulje të çmimeve të produkteve ushqimore bazë.

“Tashmë ka filluar trendi i uljes së çmimeve të disa produkteve, veçanërisht bukës, qumështit, produkteve të qumështit dhe disa produkteve të mishit. Një prodhues i caktuar qumështi para 4-5 ditësh kishte çmim mbi 80 denarë, ndërsa sot çmimi është 76 dhe me shumë mundësi nga 1 dhjetori do të ketë ulje të mëtejshme. Disa prodhues të bukës kanë çmime mbi 40 denarë, ndërsa sot variojnë nga 36 deri në 38 denarë. Dhe atje presim një ulje të mëtejshme. E njëjta gjë vlen edhe për produktet e mishit. Sipas të gjitha përllogaritjeve, në ditët në vijim do të ketë ulje të mëtejshme, duke pasur parasysh se të gjitha procedurat në shitjet e EMV për lidhjen e kontratave me kompanitë prodhuese të produkteve bazë ushqimore po përfundojnë”, nënvizoi ministri.

Në takim, prodhuesit, siç tha Bekteshi, janë njoftuar edhe se janë duke u bërë analiza për masat shtesë që duhet të merren deri në fund të vitit.

Në takimin e sotëm me përfaqësuesit e prodhuesve dhe tregjeve më të mëdha zinxhirore, siç bën me dije Bekteshi, është diskutuar për ligjin e ri për mbrojtjen e konsumatorëve, i cili tashmë është publikuar në Gazetën Zyrtare.

adv