Me dëgjimin e dëshmitarëve me propozim të Prokurorisë Publike në sallën e gjyqit në “Idrizovë” sot duhet të vazhdojë gjykimi për zjarrin në diskotekën “Puls” të Koçanit, ku humbën jetën 63 persona, ndërsa mbi 200 u lënduan.

Në seancën e kaluar u dëgjuan disa dëshmitarë, të cilët në natën e kobshme ishin në diskotekë. Në dëshmitë e tyre ata e përshkruan atmosferën e panikës dhe kaosit që ndodhi në momentin kur stuhitë e zjarrit dhe tymi e përfshinë diskotekën e mbushur, si dhe pasojat që vuajnë deri më sot.

Për seancën e sotme, siç është njoftuar, duhet të dëgjohen edhe pesë dëshmitarë.

Në fillim të procesit, në fjalën hyrëse, prokurori Borçe Janev tha se gjykimi është një hap drejt konfirmimit të përgjegjësisë personale dhe institucionale duke theksuar se shoqëria duhet të përballet me të vërtetën – kush lejoi, kush heshti dhe kush nuk parandaloi të ndodh tragjedia në “Puls”. Janev theksoi se kërkohet drejtësi, jo si hakmarrje, por si pasojë e paligjshmërisë dhe detyrës së lënë pas dore.

Të pandehurit që deklaruan se nuk ndjehen fajtorë, përmes avokatëve të tyre, nga ana tjetër, e kontestuan bazën e aktakuzës. Mbrojtësit e tyre pohojnë se të akuzuarit nuk kanë ndërmarrë veprime që mund të kishin çuar në zjarr, se ata posedonin dokumentacion të vlefshëm dhe se tragjedia është rezultat i lëshimeve institucionale, ndërsa jo i fajit individual. Mbrojtja njoftoi paraqitjen e provave dhe dëshmitarëve, që sipas tyre, do ta konfirmojnë këtë tezë.

Më 16 mars të vitit 2025, gjatë pjesëmarrjes së grupit DNK në diskotekën “Puls” në Koçan, shpërtheu zjarr, ku humbën jetën 63 persona, ndërsa mbi 200 u lënduan. Në objekt kishte më shumë vizitorë se numri i lejuar, mes të cilëve edhe të mitur, ndërsa mjetet piroteknike u aktivizuan pa leje. Objekti ka punuar në mënyre ilegale më shumë se një dekadë, pa kushte teknike minimale, me rikonstruime pa leje dhe pa sistem për mbrojtje kundër zjarreve.

Për aksidentin u akuzuan mbi 30 persona fizik dhe tre juridik. Mes tyre ka pronarë lokalesh, menaxherë, inspektorë, ish kryetarë komunash, anëtarë të sigurimit dhe zyrtarë shtetëror.

Gjykimin do ta udhëheq gjyqtarja Diana Gruevska Ilievska, ndërsa prokuroria është përfaqësuar nga një ekip prej 15 prokurorësh publik.

adv

Ish-zëvendëskryeministri i parë i Maqedonisë së Veriut, Artan Grubi, është vendosur në arrest shtëpiak me vendim të Prokuroria Themelore Publike e Shkupit, në kuadër të një hetimi për dyshime për keqpërdorim të detyrës zyrtare dhe procedura të kontestuara gjatë periudhës së tij në qeveri.

Vendimi është marrë nën drejtimin e shefit të prokurorisë së Shkupit, Anel Fidoski, i cili më 20 janar 2026 u emërua në këtë post nga Këshilli i Prokurorëve Publikë i Maqedonisë së Veriut.

Sipas informacioneve të publikuara në media, prokuror lëndor në këtë rast është Daniel Kocev, ndërsa Fidoski është eprori i tij i drejtpërdrejtë në prokurori.

Autoritetet kanë vendosur që masa e paraburgimit ndaj Grubit të zëvendësohet me arrest shtëpiak dhe konfiskim të dokumentit të udhëtimit, duke vlerësuar se një pjesë e madhe e provave tashmë janë siguruar dhe se rreziku për pengim të hetimit është zvogëluar.

Prokuroria po heton dyshimet për vendimmarrje dhe marrëveshje të kontestuara për Lotarinë e Maqedonisë, gjatë kohës kur Grubi ushtronte funksionin e zëvendëskryeministrit të parë, përfshirë projekte dhe procedura që sipas hetuesve mund të kenë shkaktuar dëm financiar për buxhetin e shtetit.(INA)

adv

Edhe pse në vendimin për arrest shtëpiak për Artan Grubin vlerësimin e sigurisë e kanë bërë MPB dhe ASK, ministri i Drejtësisë Igor Fillkov kritikat për caktimin e arrest shtëpiak i ka drejtuar ndaj Prokurorisë Publike dhe gjykatës. Fillkov thotë se vendimi i tyre është skandaloz dhe se besimi në sistemin juridik është lëkundur, duke kërkuar shpjegime për vendimin dhe nga Këshilli Gjyqësor të përcaktojë nëse ekziston bazë për përgjegjësi të atyre që e kanë shqiptuar masën.

“Prokurori publik Daniel Kocev të shpjegojë mbi cilat fakte konkrete dhe argumente juridike është dhënë mendim pozitiv për zëvendësimin e paraburgimit. Drejtuesi i Prokurorisë Anel Fidoski a qëndron pas këtij vendimi dhe a mendon se kjo është mesazh për zbatim të barabartë të ligjit. Gjyqtari i procedurës paraprake në Gjykatën Penale Themelore Shkup, Marin Stanevski, cilat rrethana e kanë tejkaluar rrezikun e arratisjes te një person që për 14 muaj ka qenë i paarritshëm”, tha Igor Fillkov – Ministër i Drejtësisë.

Ndërkohë, nga Prokuroria Publike përmes një komunikate sqarojnë se për vendimin për arrest shtëpiak për Grubin në rastin “Lotaria Shtetërore” janë udhëhequr nga Ligji për procedurë penale dhe nga udhëzimet e MPB dhe ASK.

PROKURORIA PUBLIKE:

“Kushtet e tilla në rastin konkret janë plotësuar, sepse sipas vlerësimit të organeve kompetente – MPB dhe ASK – ekzistojnë informacione serioze se në repartin e paraburgimit nuk mund të garantohet siguria personale e këtij të dyshuari. Detajet për këto kërcënime janë paraqitur para gjyqtarit të procedurës paraprake. Prokuroria Publike e kupton interesin e publikut për këtë rast, por bën thirrje për përmbajtje nga komentet për vendimet legjitime prokuroriale, për të mundësuar një procedurë efikase dhe të drejtë”

Fillkov thotë se nëse ekziston kërcënim për Grubin, shteti ka mekanizma për të garantuar sigurinë edhe në paraburgim në burg. A po e transferon ministri përgjegjësinë te Prokuroria Publike dhe gjykata, kur vlerësimin e sigurisë e bëjnë MPB dhe ASK?

IGOR FILLKOV – MINISTËR I DREJTËSISË

“Nuk po ia kaloj përgjegjësinë askujt, vetëm po i konstatoj gjendjet dhe po i artikuloj shumë qartë.”

Vendimi për zëvendësimin e paraburgimit efektiv me arrest shtëpiak për Grubin u mor dje pasdite, pasi Prokuroria Publike e propozoi dhe gjykata e pranoi që ai të jetë në arrest shtëpiak, pasi më parë MPB dhe ASK kishin dhënë vlerësim se ai nuk është i sigurt në burgun e Shutkës.

adv