Hulumtimi i fundit i opinionit publik, i realizuar nga MKD.mk dhe agjencia Market Vision gjatë periudhës 2–18 mars, konfirmon trendet politike në vend, ku VLEN pozicionohet si forca e dytë politike në nivel shtetëror dhe bindshëm e para në bllokun shqiptar.

Sipas rezultateve të publikuara, VLEN gëzon mbështetje më të madhe krahasuar me partitë tjera shqiptare, duke lënë pas subjektet që për vite me radhë kanë dominuar në këtë kamp politik. Ky rezultat reflekton një zhvendosje të qartë të besimit të qytetarëve shqiptarë drejt një alternative të re politike që po ndërton besim mbi ndryshim dhe përfaqësim të denjë.
Në nivel shtetëror, VLEN renditet menjëherë pas VMRO-DPMNE-së, duke u konfirmuar si faktori i dytë politik në vend, përpara partive të tjera si LSDM, BDI dhe Levica. Përkatësisht VMRO-DPMNE gëzon 24 %, VLEN 5.1%, LSDM 4.9% dhe BDI me 4.8%. Ky pozicionim e bën VLEN një aktor kyç në skenën politike dhe një zë të fuqishëm të qytetarëve shqiptarë në institucionet e shtetit.
Rezultatet gjithashtu tregojnë një rënie të ndjeshme të besimit ndaj partive tradicionale, ndërsa rritja e VLEN shihet si reflektim i kërkesës për politikë më të përgjegjshme, më transparente dhe më afër qytetarit.

Ky trend dëshmon se qytetarët janë duke e mbështetur fuqishëm ndryshimin dhe se VLEN po shndërrohet në adresën kryesore të besimit politik te shqiptarët, por edhe në një faktor stabiliteti dhe përfaqësimi në nivel republikan.

adv

Maqedonia, para gjashtë vitesh, u shpall zyrtarisht anëtare e re e NATO-s, organizata më e fuqishme ushtarako-politike në botë, pasi pagoi çmimin më të lartë në historinë e marrëdhënieve të saj të jashtme – ndryshimin e emrit në Maqedonia e Veriut sipas parimit “erga omnes”, pra për përdorim të përgjithshëm të brendshëm dhe ndërkombëtar. Edhe pse shteti ishte i bllokuar për dekada, politika e jashtme amerikane e dëshironte fuqishëm që një vend sllav dhe i Evropës Lindore t’i bashkohej aleancës, por a është i mundur një depërtim i tillë edhe për anëtarësimin e bllokuar në BE?

Një nga momentet kyçe për vendosmërinë e Departamentit të Shtetit të SHBA-ve për ta çuar përpara procesin e NATO-s ishte reagimi ndaj akuzave të demokratëve amerikanë se Rusia ishte përzier në zgjedhjet presidenciale të vitit 2016, në të cilat fitoi Donald Trump në mandatin e tij të parë.

Atëherë u hap një hetim për lidhjet e pretenduara të Trump me Rusinë përmes prokurorit special, tashmë i ndjerë Robert Mueller. Departamenti i Shtetit, fillimisht i udhëhequr nga Rex Tillerson dhe më pas nga Mike Pompeo, e vendosën si prioritet zgjerimin e NATO-s dhe dërguan mesazhin se nëse një vend si Maqedonia, me shumicë sllave dhe ortodokse, anëtarësohet, atëherë presidenca e Trump-it është “qartësisht” e pozicionuar kundër Putinit dhe Rusisë.

Gjithashtu, gjatë fushatës, qendra kryesore e të ashtuquajturave lajme të rreme që promovonin Donald Trump ishte e vendosur në Veles, madje edhe Hillary Clinton i akuzoi të rinjtë maqedonas se kishin ndikuar në rezultatin e zgjedhjeve, duke theksuar se ishin frymëzuar nga fermat ruse të botëve dhe trollëve që më pas shpërndanin përmbajtje përmes grupeve të targetuara në Facebook, duke krijuar inxhinieri zgjedhore.

Natyrisht, që projekti të ishte i mundur, fillimisht duhej të zgjidhej kontesti për emrin i imponuar nga fqinji jugor, Greqia, dhe pjesa tjetër, siç thuhet, tashmë është histori pas nënshkrimit të Marrëveshjes së Prespës.

Sot, edhe me Marrëveshjen për fqinjësi të mirë me Bullgarinë, Maqedonia ende nuk mund të anëtarësohet në BE, edhe pse diplomacia e atëhershme pretendonte se të gjitha mosmarrëveshjet ishin tejkaluar, përpara se të vinte vetoja fillimisht nga Franca, e më pas nga fqinji lindor.

Verbëri burokratike evropiane dhe “diplomaci me pinxhur”

Komisionerja evropiane për zgjerim, Marta Kos, e cila është sllovene dhe dikur ka jetuar në të njëjtin shtet me ne maqedonasit, me paraqitjen e saj kontroverse gjatë vizitës në Shkup, tregoi se sa pak burokratët evropianë e kuptojnë problemin thelbësor të anëtarësimit të Maqedonisë në BE.

Fjalimi për “pinxhurin dhe groshën” tregoi se edhe një sllovene që duhet t’i njohë më mirë rrethanat maqedonase, është plotësisht e verbër ndaj perspektivave të vendit dhe se Brukseli nuk mendon të hapë dyert për anëtarësim të plotë në një të ardhme të afërt.

Qeveria maqedonase përpiqet të bëjë përparim diplomatik duke kërkuar garanci shtesë që përfshirja e bullgarëve në Kushtetutën e RMV-së do të jetë kushti i fundit dhe hapi i fundit madhor i “kompromisit” maqedonas ndaj kërkesave joparimore të fqinjëve. Por, deri tani nuk ka asnjë sinjal zyrtar nga Brukseli se kjo vërtet do të jetë “ndryshimi i fundit kushtetues”.

Konflikte të ngrira dhe reforma: Si do të duket BE-ja e re?

Lufta në Lindjen e Mesme do të shtyjë zgjidhjen e krizës ukrainase, e cila aktualisht më shumë i ngjan një konflikti të ngrirë, pa përpjekje të qarta për t’i dhënë fund luftës që Rusia e nisi në vitin 2022.

Ndërkohë, fuqitë e mëdha evropiane nuk mund të bien dakord se si të reformojnë Bashkimin Evropian, e aq më pak janë të gatshme të pranojnë anëtarë të rinj nga i ashtuquajturi Ballkani Perëndimor apo nga skajet më lindore – Moldavia, Gjeorgjia, Ukraina.

Përveç reformave dhe përmbushjes së kritereve të Kopenhagës, vendimi për zgjerimin do të jetë politik dhe me shumë gjasë vendet do të pranohen në paketë, njëherësh. Përndryshe, fragmentimi i procesit të integrimit evropian për vendet e Ballkanit mund të përkeqësojë stabilitetin e rajonit dhe të aktivizojë mosmarrëveshje të reja ndërfqinjësore, e me këtë edhe kërkesa të reja, veçanërisht ndaj Maqedonisë.

Goditje e re në horizont apo durim strategjik

Testimi i pretendimeve të Brukselit për “kushtin e fundit maqedonas” mund të bëhet përmes ndryshimeve kushtetuese për përfshirjen e bullgarëve, por me një dispozitë për shfuqizimin e këtij ndryshimi nëse nuk ndodh zhbllokimi i anëtarësimit në BE dhe heqja e vetos.

Nga ana tjetër, duhet ndjekur me kujdes sinjalet gjeopolitike, të cilat tani janë shumë të paparashikueshme dhe të papritura, sepse gjëja e fundit që i duhet shtetit maqedonas është një vetëposhtërim i ri pa marrë integrim të plotë në institucionet ndërkombëtare, ku nuk do të ketë më kërcënime me veto dhe bllokada nga fqinjët me kërkesa të reja që cenojnë identitetin kombëtar.

adv

Kryeministri Hristijan Mickoski sot komentoi deklaratat e djeshme të Arben Taravarit për gjendjen e shqiptarëve në qeverinë aktuale, përcjell TV21. Mickoski tha se Taravari këtë e bën për t’u vardisur sa më shumë te partneri i ri i koalicionit, BDI.

“Shikoni, unë ende nuk mundem të befasohem se pse z.Taravari vuan për biznesin Gjoka ku nuk pati sukses dhe në opinion shpik gjëra që nuk kanë absolutisht asnjë lidhje me realitetin. Unë shumë herë i kam komentuar marrëdhëniet në qeveri dhe marrëdhëniet me partnerin tonë, ndryshe mund të them se janë parimore, për dallim me marrëdhëniet që kemi pasur me z. Taravarin, që ishin vardisëse nga ana e tij, kështu që supozoj që atë parim të vardisjes që e ka zbatuar te unë, tani po e zbaton te partneri i ri i koalicionit, BDI. Atëherë në komunikim me mua ashpër i kritikonte, tani supozoj në komunikimin për t’u vardisur sa më shumë te Ali Ahmeti, më kritikon mua”,tha Taravari.

Ndryshe, Taravari mbrëmë drejtoi kritika të ashpra ndaj kryeministrit Mickoski, ku e akuzoi për dobësimin e qëllimshëm të faktorit politik shqiptar.

“Mickoski arriti t’i margjinalizojë totalisht shqiptarët dhe tregoi se mund të qeverisë edhe me një grup partitë të vogla, të cilat as nuk duhet të bëjnë diçka, as nuk dinë”, deklaroi Taravari në Telma, duke shtuar se shumica e ministrave nga blloku shqiptar ishin anonimë dhe pa përvojë pune.

Sipas tij, pikat kryesore të marrëveshjes koalicionare kanë mbetur vetëm në letër, ndërsa shtoi se decentralizimi fiskal jo vetëm që nuk ka ndodhur, por ligji i ri për vetëqeverisjen lokale ka zvogëluar edhe më tej kompetencat e komunave.

Taravari theksoi se është më mirë të jesh në opozitë sesa të jesh një kukull në qeveri.

“Unë karakterologjikisht nuk mund të jem kukull në një qeveri… Të jesh pjesë e një sistemi që është jo-funksional është idiotizëm”, tha Taravari.

adv

Ministri i Shëndetësisë, Azir Aliu, zbuloi se një mjek nga shëndetësia publike ka marrë një pagë enorme, por pa e bërë publik identitetin e tij.

Rasti do të trajtohet në mënyrë institucionale, ndërsa nuk përjashtohet edhe përgjegjësi penale, raportoi 4news.mk.

“Edhe Ministria e Shëndetësisë edhe Qeveria i njohin institucionet, na lejoni ta zgjidhim këtë në mënyrë institucionale. Nuk guxoj t’i bëj publike detajet në një konferencë për shtyp, sepse mund të rrezikoj një sistem që nuk duhet të rrezikohet. E dimë që puna jonë mund të përfundojë brenda dy javësh, por këto janë procedura dhe do të duhet që institucione të tjera ta trajtojnë rastin”, tha ai.

adv

Drejtori i MEPSO-s, Burim Latifi, ka marrë pjesë në Asamblenë e Përgjithshme të ENTSO-E, e cila u mbajt në Bruksel, ku u diskutuan zhvillimet kyçe për sistemin elektroenergjetik evropian, informon POPULLI.mk

Gjatë këtij takimi, në fokus të diskutimeve ishte paketa “Grids Package”, roli i ENTSO-E në tregun e energjisë elektrike, si dhe prioritetet e ardhshme për zhvillimin e sektorit. Po ashtu, vëmendje e veçantë iu kushtua masave për forcimin e sigurisë së sistemit elektroenergjetik në nivel evropian.

Në kuadër të debatit u theksua qartë nevoja për rritjen e bashkëpunimit rajonal, si dhe përshpejtimi i investimeve në infrastrukturën e transmetimit, si elemente kyçe për një sistem më të qëndrueshëm dhe efikas.

Latifi theksoi se qëllimi i MEPSO-s mbetet i qartë: të kontribuojë në mënyrë aktive në proceset evropiane dhe të harmonizohet në kohë me sfidat dhe zhvillimet e reja në sektorin energjetik. / © POPULLI.mk

adv

Në Veles ka nisur instalimi i kamerave në rrugët kryesore të qytetit në kuadër të projektit “Qyteti i Sigurt”, ku aktualisht në terren po vendosen kabllot, kutitë metalike, shtyllat dhe pajisjet e nevojshme, të cilat do të mundësojnë mbikëqyrjen dhe rritjen e sigurisë publike.

Nga Sektori i Punëve të Brendshme në Veles, sistemi pritet të vihet në funksion në fund të korrikut të këtij viti.

“Prioriteti për vendosjen e kamerave përcaktohet sipas kritereve të sakta të sigurisë. Fokusi do të vendoset në arteriet kryesore të trafikut, ku është regjistruar një frekuencë më e lartë e automjeteve dhe këmbësorëve, si dhe në kryqëzimet kyçe ku shpesh ndodhin shkelje të rregullave të komunikacionit, me qëllim rritjen e sigurisë së përgjithshme”, informuan nga SPB Veles.

Nga atje sqarojnë se numri i lokacioneve do të jetë në përputhje me nevojat, me qëllim që të mbulohen të ashtuquajturat “pika të zeza”, ku sipas statistikave ndodhin më së shumti aksidente trafiku.

Numri i saktë dhe lokacionet specifike do të përcaktohen pas përfundimit të planifikimit teknik, por qëllimi është mbulim i plotë dhe efikas i zonave kritike.

Deri më tani, pas periudhës testuese, sistemi “Qyteti i Sigurt” nga 1 shkurti 2026 ka filluar të funksionojë në Shkup, Kumanovë dhe Tetovë, si dhe në Korridoret 8 dhe 10, me çka ka nisur edhe sanksionimi i shoferëve që kanë bërë shkelje të kapura nga kamerat.

adv

Një rast vjedhjeje është denoncuar më 26 mars 2026 rreth orës 15:30 në Departamentin Policor të Tearcës, ku sipas informacioneve, gjatë intervalit kohor nga ora 12:00 deri në 15:00 është kryer një vjedhje në xhaminë e fshatit Sllatinë, në Tetovë.

Sipas njoftimit, persona të panjohur kanë hyrë në objekt dhe, duke përdorur forcë dhe mjete të forta, kanë hapur arkën e kontributeve vullnetare, nga e cila kanë marrë para.

Në vendin e ngjarjes ka intervenuar ekipi i SPB Tetovë, i cili ka kryer këqyrjen dhe po ndërmerren masa për zbardhjen e plotë të rastit.

adv