Një punëtor ndërtimi ka humbur jetën, ndërsa tre të tjerë janë lënduar rëndë pasi janë zënë nga dheu në një kantier ndërtimi në komunën e Kisella Vodës në Shkup, njoftoi për MIA-n doktor Dragan Panov, shef i turnit në Ndihmën e Shpejtë – Shkup.

Sipas tij, sipas informacioneve të para, të lënduarit janë rreth moshës 35 deri në 45 vjeç, ndërsa viktima është rreth 34 vjeç. Ai shtoi se ekipet kanë ndërhyrë me katër autoambulanca.

adv

Në seancën e 9-të të Këshillit Komunal të Butelit, këshilltarët e Aleancës për Shqiptarët ngritën shqetësimin se një numër fëmijësh rrezikojnë të mbeten jashtë procesit arsimor për shkak të pengesave administrative që lidhen me regjistrimin në shkolla dhe çerdhe.

Nga ASH bëjnë të ditur se gjatë seancës janë hapur dy çështje kryesore me interes publik. E para ka të bëjë me procesin e punësimeve në shkollat fillore të komunës, ku është kërkuar transparencë e plotë dhe sqarim nëse punësimet do të realizohen përmes konkurseve të hapura apo do të ketë, siç u tha, ndikime partiake.

Çështja e dytë, e cilësuar si më urgjente, lidhet me regjistrimin e fëmijëve nga familjet që jetojnë me qira ose nuk kanë përfunduar procesin e legalizimit të pronave, duke mos siguruar dokumentacionin e kërkuar nga komuna.

Sipas ASH-së, ekziston rrezik real që shumë fëmijë të mbeten jashtë sistemit arsimor, ndërsa në debat u përmendën edhe raste konkrete të qytetarëve që po përballen me këto pengesa.

Nga përfaqësuesit e komunës, sipas njoftimit, është thënë se regjistrimi do të mundësohet vetëm për qytetarët që posedojnë kontrata afatgjata të qirasë ose dëshmi pronësie.

Aleanca për Shqiptarët vlerëson se e drejta për arsim nuk duhet të kushtëzohet me procedura administrative dhe kërkon zgjidhje urgjente nga komuna për të shmangur, siç thonë, përjashtimin e fëmijëve nga arsimi.

“Fëmijët nuk duhet të penalizohen për shkak të statusit të banimit të familjeve të tyre”, theksojnë nga ASH, duke paralajmëruar se do të vazhdojnë të kërkojnë përgjegjësi institucionale për këtë çështje.

adv

Moti sot në Maqedoninë e Veriut do të jetë me diell dhe vranësira.

Në vend do të fryjë një erë e lehtë nga drejtimi verior.

Temperaturat minimale do të lëvizin nga -1 deri 6, ndërsa temperaturat maksimale do të lëvizin nga 15 deri 23 gradë celsius.

Gjatë fundjavës moti pritet të jetë me diell dhe vranësira.

adv

Kryeministri i vendit, Hristijan Mickoski në Tv “Sitel” tha se në Qeveri do të ketë ndryshime, duke e përmendur edhe zëvendëskryeministrin dhe përfaqësuesin e VLEN-it, Arben Fetai.

Mickoski tha se ka zhvilluar një bisedë personale me të, ku ai e ka njoftuar se në të ardhmen nuk do të jetë më pjesë e ekzekutivit.

“Patjetër se do të ketë ndryshime, ky është fakt – do të ketë ndryshime. Pasi e përmendët zëvendëskryeministrin Fetai, po, ne biseduam personalisht unë dhe ai, dhe ai më përcolli se në të ardhmen nuk do të jetë më pjesë e Qeverisë që unë e udhëheq”, deklaroi Mickoski.

Sipas tij, Fetai ka shprehur synimin për t’u kthyer në Bruksel, ku, siç tha ai, mund të vazhdojë angazhimin profesional në institucione evropiane.

“Duke pasur parasysh arsimimin dhe përvojën e tij në Bruksel, mendoj se mund të jetë një mundësi e mirë që ai të jetë i angazhuar në kuadër të administratës së Brukselit ose Parlamentit Evropian”, shtoi Mickoski.

Kryeministri theksoi se në bisedimet mes tyre është vlerësuar se përvoja e Fetait duhet të shfrytëzohet në funksion të shtetit dhe institucioneve evropiane.

adv

Zoran Ristovski – Gjuza është emëruar drejtori i ri i servisit publik. Këshilli Programor i Radio Televizioni i Maqedonisë sot i dha besimin Ristovskit që në tre vitet e ardhshme të drejtojë këtë institucion mediatik.

Ristovski, për të cilin prej kohësh në opinion qarkullonin spekulime se do të zgjidhej, në këtë funksion do ta pasojë Marjan Cvetkovski, i cili ishte në krye të servisit publik radiodifuziv për rreth 14 vite, që nga zgjedhja e tij në vitin 2012.

Në seancë, për Ristovskin kanë votuar 12 nga gjithsej 13 anëtarë të Këshillit Programor, ndërsa vetëm një nuk i ka dhënë mbështetje. Në garë, si kandidatë të paraqitur në konkurs, kanë qenë gjithsej shtatë persona: Toni Glamçevski, Iskra Rebac, Pero Popov, Zoran Bogatinov, Sotir Sotirovski dhe Igor Sebishki.

Zgjedhja e Ristovskit nuk konsiderohet surprizë, pasi emri i tij në disa raste ishte përmendur si kandidati më serioz për ta zëvendësuar Cvetkovskin në postin e drejtorit.

adv

Në përputhje me Ligjin e ri për arsim të mesëm, këtë vit maturantët do t’i nënshtrohen tre llojeve të provimeve përfundimtare: maturës shtetërore, maturës shtetërore profesionale dhe maturës shtetërore artistike.

Sipas kalendarit të Qendrës Shtetërore të Provimeve (QSHP), provimet eksterne për maturën shtetërore 2025/2026 do të zhvillohen në dy termine kryesore. Më 6 qershor, gjimnazistët do t’i nënshtrohen testimit në një nga lëndët me zgjedhje: gjuhë angleze, frënge, gjermane, ruse, italiane, matematikë apo histori. Ndërsa më 11 qershor, ata do të japin provimin në gjuhë dhe letërsi amtare – maqedonase, shqipe, turke apo serbe.

Për nxënësit e shkollave profesionale, provimi i parë intern do të mbahet po më 6 qershor, ku ata do të zgjedhin mes gjuhës angleze dhe matematikës. Provimi ekstern në gjuhë dhe letërsi amtare është caktuar për më 12 qershor.

Ndërkohë, maturantët e drejtimeve artistike do të testohen më 6 qershor (gjuhë angleze ose histori), ndërsa më 12 qershor do të zhvillojnë provimin në gjuhë dhe letërsi amtare.

Të dhënat nga viti i kaluar tregojnë për një pjesëmarrje të lartë: në vitin shkollor 2024/2025, për afatin e qershorit u regjistruan gjithsej 15,004 nxënës. Megjithatë, për shkak të përpjekjeve për kopjim dhe parregullsive të tjera, u anuluan testet e 172 maturantëve.

Autoritetet apelojnë për respektim të rregullave gjatë provimeve, duke theksuar se masat kundër parregullsive do të mbeten strikte edhe këtë vit.

adv