Delegacioni i Lëvizjes BESA me në krye Bilall Kasamin bashkë me Blerim Sejdiun, Fatmir Limanin dhe Adnan Azizin të shtunën do të mbajë tubim qendror në Cyrih, ku do të formalizohet struktura e Lëvizjes BESA për Zvicër.

Gjithashtu Kasami do bashkëbisedojë me mërgatën shqiptare atje, duke marë sugjerime nga diaspora. Kujtojmë se këtë javë në Zvicër kanë qendruar eksponent të Lëvizjes BESA, ku kanë realizuar takime në kantone të Zvicrës, me qëllim organizimin e strukturës.

Tubimi do të mbahet me 08.10.2022, të shtunën, ora 19:00, në Wallisellerstrasse 7, 8152 Opfikon, Zürich.

Studentët e Universitetit të Tetovës edhe këtë vit akademik e filluan pa konviktin studentor, pavarësisht se studentët e rajonit dhe qyteteve tjera që studiojnë në këtë universitet kanë nevojë të madhe. Punimet ndërtimore për të njëjtin kanë përfunduar, ndërsa në procedurë është pjesa e mobilimit. Autoritetet vazhdimisht kanë zgjatur afatet kohore për këtë konvikt. Sot, Ministria e Arsimit dhe Shkencës (MASH) nuk ka përgjigje se kur ky konvikt, i cili premtohet prej vitit 2016-të, do jetë gati, shkruan Portalb.mk.

Mungesa e konviktit studentor tani e disa vite është problem për shumë studentë nga qytete dhe shtete tjera të cilët studiojnë në Universitetin e Tetovës. Sipas tyre, gjetja e akomodimit privat nuk është e thjeshtë ndërsa çmimet e banesave private janë të shtrenjta, kurse mbulimi i harxhimeve është i papërballueshëm për një student, sidomos me rritjen e çmimeve kohëve të fundit. Ndërsa gjetja e një apo më shumë kolegu për të bashkëjetuar dhe ndarë harxhimet nuk është gjithmonë e lehtë.

Autoritetet kanë shkelur afatet e realizimit dhe vazhdimisht kanë premtuar afate të reja të përfundimit të projektit por pa rezultat përfundimtar deri më sot, kur këtë jave edhe filloi viti i ri akademik 2022/23.

Universiteti i Tetovës për Portalb.mk theksoi se ky konvikt  është investim i Ministrisë së Arsimit dhe Shkencës dhe se i njëjti menaxhohet nga ky dikaster.

“Universiteti i Tetovës ka marrë për sipër ta realizojë kyçjen e ujit dhe kanalizimin. Për kryerjen e këtyre punimeve, Universiteti ynë së shpejti do t’i fillojë procedurat e prokurimit publik. Në dijeninë tonë godina është në fazën përfundimtare të mobilimit, por për informata zyrtare për fillimin e funksionimit, përkatësisht pranimin e studentëve, ju lutemi drejtohuni te MASH si institucion kompetent”, thanë nga Universiteti i Tetovës.

Nga Ministria e Arsimit dhe Shkencës nuk tregojnë se kur konkretisht ky konvikt do të jetë gati për tu lëshuar në përdorim të studentëve.

“Konvikti studentor në Tetovë është tërësisht i ndërtuar, gjegjësisht kanë përfunduar të gjitha aktivitetet ndërtimore, mbetet procesi i mobilimit. Më pas do të vihet në dispozicion të studentëve, për të cilin do të shpallet konkurs për akomodim”, thanë nga MASH.

Ndërtimi i shtëpisë studentore në Tetovë është investim me vlerë prej 166,5 milionë denarëve, objekti do të ketë 305 krevate.

Përveç dhomave të fjetjes, në këtë shtëpi studentore është paraparë të ketë edhe dhomë teknologjike, leximore, sallë ku studentët do të mund të ushtrojnë fitnes, hapësirë për meze, etj.

I njëjti premtohet nga viti 2016, në ditën kur Qeveria e Maqedonisë së Veriut miratoi ligjin për themelimin e Universitetit “Nënë Tereza” u paralajmërua edhe ndërtimi i këtij konvikti, në të njëjtin vit u hap edhe tenderi për ndërtimin e këtij konvikti.

Përkundër faktit se tenderi për ndërtim u hap në shtator të vitit 2016, nuk kishte vendim për fillim të punëve, ky vendim zyrtarisht u mor në fund të marsit të vitit 2018 dhe ishte paraparë që ky objekt të finalizohet në prill/maj të atij viti.

Por edhe në këtë afat kohor nuk u bë. Më pas, ish zëvendësministri i Arsimit, Arafat Shabani, tha se konvikti duhej të përfundonte në fund të vitit 2021, por edhe kjo nuk u bë.

Ndërsa në fillim të këtij viti, ministri Shaqiri deklaroi se pritet të jetë gati për këtë semestër i cili filloi në tetor, që edhe kjo nuk u bë.

Kryetari i Komunës së Butelit Darko Kostovski ka deklaruar se në shkollën fillore “Panajot Ginovski” kanë pranuar 20 nxënës më tepër, të cilët nuk i përkasin Komunës së Butelit, andaj nevojën për hapjen edhe të një paralele të tretë e sheh të panevojshme, përcjell TV21. Ai tha se janë hapur 2 paralele dhe se kërkesa për hapjen e paraleles së tretë është joparimore.

“Në përputhje me rajonizimin, regjistruam 40 nxënës të klasës së parë në gjuhën shqipe në shkollën Panajot Ginovski. Për vullnet të mirë, me rekomandim timin, këshilli u pajtua që të regjistrohen edhe 20 nxënës, të cilët janë jashtë rajonizimit për të plotësuar 2 paralele. Dhe menjëherë pas kësaj erdhën edhe disa nxënës të cilët janë jashtë rajonizimit, për të cilët ne nuk kemi detyrim për t’i pranuar dhe diku numri arriti deri 61-62 dhe mendoj se është shumë joparimore të kërkohet paralelja e tretë.
Mendoj se hapin që bëri komuna e Butelit është me të vërtetë në drejtim të një bashkëjetese të mirë. Ne u pajtuam që të regjistrohen plus 20 fëmijë të cilët janë jashtë Butelit me vendim të këshillit të Butelit”, tha Kostovski.

Bujar Ramadani, mjeku i ri në spitalin shtetëror të Shkupi në fushën e Onkologjisë e cila ka të bëjë me trajtimin e kancerit po lë gjurmë në këtë sferë.

Pas diplomimit në Fakultetin e Mjekësisë në Universitetin “Shën Kirili dhe Metodi” – Shkup, Dr.Ramadani u sistemua në Klinikën Universitare për Radioterapi dhe Onkologji.

Nga pacientët e shumtë të cilët adresohen tek Dr. Bujar Ramadani ai gjen kohë që nga orët e hershme të mëngjesit e deri në mbrëmje për t’u dalë në ndihmë dhe për t’i këshilluar rreth procedurën së mjekimit. Pacientët janë nga të gjitha anët e vendit por edhe nga Kosova të cilët zgjedhin Dr. Ramadanin për t’u konsultuar rreth kancerit në gji.